Dewleta tirke serra 2017î de Şehîdgehê Garzanî yê taxa Oleka Jore ya Bedlîsî rijnaybi û cenazayê gerîlayan remnaybî Îstanbul. 282 cenazayan ra 261 cenazayî Goristanê Kîlyosî de 18 goran de pêser ameyî definkerdene.

Derheqê babete de avûkatanê OHDyî goristan de dest pê cigêrayîşan kerd. Îdarekarê Merkezê Pêroyî yê OHDyî Bulent Aşayî cigêrayîşî ra dima eşkerayîyêke daye û vat: ''Ne huqûq de ne zî exlaq de cayê nê kerdişî çin o.'' Aşayî ard ziwan ke ê do raporêk amade bikerê û rayaumûmîye reyde pare bikerê û babete biresnê asta neteweyî û mîyanneteweyîye.