Şubeyê OHDyî yê Anqara raporê xo yê derheqê qirkerdişê keyeyê Dedeogullariyî eşkera kerd. 

Rapor de ame vatene ke cîrananê keyeyî Keleş û Çalikî ferdanê Dedeogullariyî rê 15 serrî yo bi hawayêkê sîstematîkî nîjadperestîye kerdêne û hêrişê vera keyeyî 10 serrî verî kerdî. Hêrişkeran 10 serrî verî çeke naye keyeyê Dedeogullariyî.

Rapor de dîya zanayene ke 12ê gulane de Yahya Çalik, Velî Keleş, Lutfu Keleş, Alî Keleş û Ramazan Çalik pê daran hêrişê Metîn û Bariş Dedeogullariyî kerd û dima zî hêrişkeranê bînan pê kard û daran hêrişê keyeyî kerd.

Rapor de wina ame vatene: ''Hêrişkeran vat ê nîjadperestê tirkî yê, ê do kurdan tîya ra bivejê. Yaşar Dedeogullariyo ke nê hêrişî de birîndar bibi vat ke 10 serrî yo mabênê înan de nakokîye esta û sebebê na nakokîye zî kurdayetîya înan a. Rapor de dîya zanayene ke 12ê gulane de ferdê keyeyî maruzê hêrişî bîyî û Bariş, Sîbele, Metîn, Yaşar, Serape, Serpîle Dedeogullari nê hêrişî de birîndar bîyî.

Rapor de wina ame vatene: ''Rixmo ke keyeyê Dedeogullariyî 4-5 reyî venga polîsan dayo hêrişkerî cayê serebûtî ra remayî. 13ê gulana 2021î de gerreyê Dedeogullariyî ser o Ayşe Keleş, Lutfu Keleş, Velî Keleş, Alî Keleş, Yahya Çalik, Alî Çalik tepişîyayî û Îbrahîm Keleş û Ramazan Çalik zî pê şertê kontrolê edlîyî vera dîyayî. Dima Hakîmîya Ceza Ayşe Keleş, Yahya Çalik, Velî Keleş û Alî Çalik vera dayî. Alî Keleş û Lutfu Keleş hema zî tepişte yê.

22ê gulane de Ramazan Çalik, Alî Çalik, Ahmet Keleş, Şerîfe Çalik, Hatîce Keleş, Merve Şen, Esma Keleş keyeyî rê gef wendo. Bariş Dedeogullariyî zî roportajêkê xo de no ardo ziwan.

Cayê hêrişî de 3 kamerayî estê. Deşîfrasyonê kameraya baxçeyî ame kerdene la dozgerîye pare kerdo ke kamerayê hetê çepî û peyê keyeyî hema nêameyî deşîfrekerdene. Heman wext de ame vatene ke hêrişker merdimê keyeyê hêrişkerî yo û hema nêtepişîyayo. Goreyê xeberanê çapemenîye hêrişker birayê Ayşe Keleş o.

Hêrişker verî salone de ferdanê Dedeogullariyî de qisey keno, dima çeke vejeno, ferdê keyeyî xo erzenê hêrişkerî ser, endamê keyeyî wazenê çeke destê ey ra bigêrê la hêrişker xo xelisneno û dano 7 kesan rı. 20 fîşekî dekewenê keyeyê Dedeogullariyî. Hêrişker dima şino wesayîtê xo wazeno benzîn bîyaro û keyeyî bivêşno. Dima ke beşêkê baxçeyî vêşeno hêrişker remeno.''