Serçete Sedat Pekerî îdîa kerd ke Mehmet Agarî û ekîpa ci vera elewîyan amadekarîya provakasyonî kenê û nê kesî do sey Qirkerdişê Gazî hêrişê cemxaneyî bikerê. Wextê Qirkerdişê Gazî de 26 serrî verî 22 kes kişîyayî û o çax Mehmet Agar Mudiro Pêroyî yê Asayîşî bi.

Serekê Konfederasyonê Yewîya Elewîyan ê Ewropa (AABK) Turgut Okerî derheqê babete de ANFyî rê qisey kerd.

Okerî ard ziwan ke beno ke îdîaya Pekerî raşt a û vat: ''Tarîxê nêzdî de vera elewîyan qirkerdişê winasênî zaf bîyî. Hukmat nika nêeşkeno Tirkîya îdare bikero, krîzê zereyî giran bîyo. Dewlete key teng bîye elewîyî qir kerdî. Coka çew nêeşkeno garantî bido ke çîyo ke Pekerî vato do nêqewimîyo.

Eke hêrişo winasên nêro kerdene zî no nêno a mana ke hînî hêriş do nêro kerdene. Xora Peker parçeyêkê nê rêxistinan bi la no nêno a mana ke çîyê ke ey qala ci kerda raşt nîyê. Ma zanenê ferasetê dewlete do pê weçînayîşî nêşoro. Vera cemxaneyî hêrişêk nêro kerdene zî nê vateyî blof nîyê. Coka ganî hêzê demokrasî paştdayîşê xo xurt bikerê û xo rêxistin bikerê.''