Serekwekîlê Gruba Partîya Şaran a Demokratîke (HDP) Saruhan Olûçî meclîs de kombîyayîşêkê çapemenîye viraşt.

Olûçî destpêk de 301 karkerê ke komkiştişê Soma de cuya xo kerda vîndî yad kerdî.

Olûçî bale ante serê grevê vêşanîye û rojeyê mergî yê vera tecrîdkerdişê Rayberê Şarê Kurdî Abdullah Ocalanî û ard vîrî, Leyla Guvene 187 rojî yo grevê vêşanîye de ya û rewşa grevê vêşanîye reste merheleya krîtîke.

Olûç selahîyetdaran ra persa “Şima hîna çi pawenê?” û vat, “Seba caardişê huqûqî, seba caardişê qanûnan, qanûnê bingeyênî û peymananê mîyanneteweyî şima çi pawenê? Şima zî vînenê 2'ê Gulane de avûkatan reyde bi pêvîyaşê reyêk  perse çareser nêbena. Seba ke perse çareser biba şima çira gamêk nêerzenê? Seba serrastkerdişê na rewşa ke vera huqûqê heqanê merdiman a, şima çira game nêerzenê?”           

Olûçî vengdayîş bi partîyanê mûxalefetî kerd û vat, “Ma wazenê Îyî Partî û CHP'yî ra bipersê. Gelo xeylî bi şima zor o ke şima vajê, ‘Ganî Ocalan bieşko avûkatanê xo reyde pêvînayîşan virazo,  ganî huqûq bêro caardene’. Serekê Pêroyî yê MHP'yî zî bira pozîsyonê xo qifş o, fikrê xo eşkera kerd ke ganî avûkatî bieşkê Ocalanî reyde pêvînayîşan bikerê. Şima partîyê mûxalefetî yê. Şima do key nê tewirê xo yê nakokî yê vera huqûq û demokrasî bivurnayê.”

Olûçî da zanayene ke, babeta wayîrvejîyayîşê heqanê hukumwerdoxan de ganî partîyê mûxalefetî hîna bicesaret bikewê mîyanê têgêrayîşî.