Serekwekîlê Grûba HDPyî Saruhan Oluçî Meclîs de kombîyayîşêkê çapemenîye serûber kerd û derheqê babetanê rojdemî de tay ercnayîşî kerdî.

Ercnayîşanê Oluçî ra beşêk wina yo:

''Îdlîb

Ma seba serebûtê Îdlîbî vera kerdişê yew roniştişê girewteyî yê. Ganî meclîs bêro pêser. Eke roniştişêko girewte bêro kerdene îqtîdar û muxalefet reyna heman çîyan do vajê. Ma wina fikirîyenê ke bi roniştişê girewteyî yeno armanckerdene ke şarî ra rastîyî bêrê nimnayene. Ma roniştişê girewteyî qebul nêkenê.

Sînor û multecîyî

Dîmenê ke sînor de yenê dîyene şermêko pîl o. Multecîyî seba koçkerdişan yenê teşwîqkerdene.  Vanê 100 hezar multecîyî şîyî ver bi sînorî. no rast nîyo. Bi nê zûran wazenê ke şar meseleyanê rastikênan ra dûr bikewo. Merdimî bazirgananê merdiman reyde kar kenê. Bi hawayêkê eşkera sînor de sucê merdimîye yenê kerdene.

Şer nêame îlankerdene la Îdlîb de şer esto. Şer yeno manaya mergî. Ma wezto ke tezkere ser o muneqeşa kerdêne Meclîs de no çi vat. Îqtîdar bi polîtîkaya Sûrîye zerarêkê pîlî dano şar û welat.

Şewat û Îmrali

Roja şewatî ra nata derheqê weşîya Birêz Ocalanî de û yê tepişteyanê bînan de yew zanayîşo rastikên nêame girewtene. Ma pabeyê ci yê derheqê na babete de hetê selahîyetdaran ra zanayîşî bêrê dayene. Ganî cade seba na mesele gamêke bêra eştene. Çunke nê rojanê zimistanî de vejîyayîşê şewatî tesadufî nîyo. Şarê ma seba na mesele zaf qerqilîyeno.

Darbeya 2ê Adare

2ê adara 1994î de vera wekîlanê Partîya Demokratîke (DEP) û sîyasetê kurdan darbeyêke ameye kerdene. Na darbe nêna vîrkerdene. Netîceya na darbe zî Tirkîya rê bi hawayêkê giranî tesîr kerde.''