Parlamenterê HDP’yî yê Dêrsimî Alîcan Onluyî vat hetêk ra nameyê qezaya Bahşîlî ya Kirikkale goreyê waştişê şarê cayîyî yeno vurnayene, la hetêna ra seba ke tabelaya Dêrsimî ya şaredarîye bêro qedexekerdene cehd yeno kerdene, no “huqûqê dişmenîye” yo.
Mehkema qeraro ke Meclîsê Şaredarîya Dêrsimî seba nameyê Dêrsimî dabi, bi îtîrazê walîtîye bicaardişê qerarî vindarnabi. Hemverê nê de qezaya “Bahşîlî” ya Kirikkale seba ke mîyanê şarî de sey “Bahşili” yena telafuzkerdene sey “Bahşili” amebi vurnayene.
Hetkarê hemserekê pêroyî yê Partîya Şaran a Demokratîke (HDP) û Parlamenterê Dêrsimî Alîcan Onluyo ke organîzekerdişî ra mesuldar o, derheqê meseleyê qebûlkerdişê waştişê şarê Kirikkaleyî yê vurnayîşê nameyi de û astengkerdişê nameyê Dêrsimî de ercnayîşî kerdî.
‘Huqûqo Dihet Yeno Biccardene’
Onluyî nê vatî: “Tirkîya û Kurdistan de huqûqo dihet esto. Eke kes hîna rast biname bikero bêhuqûqî esta. Ma nêvanê ke rojawanê Tirkîya de huqûq tam yeno bicaardene. Ancax Kurdistan de çîyo ke yeno bicaardene huqûqê dişmenîye yo.
Tirkîya de hemverê Kurdan û Elewîyan de huqûqê dişmenîye yeno bicaardene. Kirikkale de nameyo ke mîyanê şarî de yeno şuxulnayene yeno qebûlkerdene, la nameyê Dêrsimî yo ke hetê şarê ûcayî ra yeno şuxulnayene sey sûc yeno qebûlkerdene. Ma nêeşkenê nê distandardîye qebûl bikerê.
Dêrsim de şar tekperwerîye qebûl nêkeno, wazeno ke ziwan û kulturê xo bido ciwînayene. Şarê Dêrsimî vano ‘ez wazena bi kamîya xo ya tarîxîye biciwîyî.’ Ganî meseleyê tabelaya ke şaredarîye rê ameya daleqnayene destê dadgerîya ke bîya Komîsyonê Huqûqî yê AKP’yî de nêro veradayene. Na tena tabelayêk nêya, na kamîya ê şarê ûca ya. Ganî Meclîsê Şaredarîye peyê qerarê xo de vindero. Ganî kerdişê xo de biisrar bo û bi paştdayîşê şarî mucadeleyî aver bero.”
