Dîmenê ciwananê ke Mersîn de govende girewtêne û sloganî vatêne hetê hesabanê trolan ra medyaya dîjîtale de sey hedefî ameybî mojnayene. Wezîrê Karanê Zereyî Alî Yerlîkayayî bi notê ''Çîyo hewce ameyo kerdene'' 22yê temmuze de da zanayene ke nê 9 ciwanî bi îdîaya ''Endamîya rêxistine'' ameyê destbendkerdene. Dosyaya ciwanan ser o bira nimitişî ameye ronayene. 

Polîsanê tirkan dima ke ciwanî destbend kerdî deyîra ''Olurum Turkiyem'' wesayîtê xo de bi ciwanan daye goşdarîkerdene û dîmenê nê kerdişî medyaya dîjîtale de vila kerdî.

Wekîlê DEM Partî yê Mersînî Alî Bozanî bi eşkerayîyêke vera serebûtî nêrazîbîyayîşê xo mojna. Bozanî ANFyî rê pare kerd ke îfadeyê ciwanan yenê girewtene, nêzanîyeno ke ciwanî key do vejîyê verê mehkeme û ciwanî seba ke deyîra kurdkî reyde govende girewtêne yenê sûcdarkerdene.

Bozanî pê hesna ke no serebût çîyêko organîzekerde yo û vat: ''Hezîrane de komêka ciwanan seba tehtîlî Dîlokî ra şinê Mersînî, qeraxê dengizî de deyîranê kurdkî reyde govende gênê û vengêkê sloganî yeno. Nêzanîyeno ke kamyew ciwan sloganî vano. Nê ciwanî hetê trolan ra sey hedefî ameyî mojnayene û name, peyname û hesabê înan ê medyaya dîjîtale ameyî teşhîrkerdene. Dima nê ciwanî bi operasyonî ameyî destbendkerdene. Hesabanê trolan senî no vîdeoyo kahan dîyo, nameyê ciwanan tesbît kerdê? Eşkera yo ke nê çîyî hetê emnîyetî ra ameyê servîskerdene.''

Alî Bozanî ard ziwan ke dîmenê operasyonanê polîsan sey operasyonê vera mafyayan ameyê girewtene û vat: ''Ciwanî ancax bi propaganda do bêrê sûcdarkerdene. La dîmenî wina nênê servîskerdene. Polîsan wesayîtê xo de bi ciwananê destbendkerdeyan deyîra 'Olurum Turkiyem' daye goşdarîkerdene. 

Wezîrîya Karanê Zereyî qestî ra nê dîmenî servîs kerdî. Xora sloganê 'Bijî Serok Apo' hetê mehkemeyan ra sey sûcî nêame dîyene. Eşkera yo Wezîrê Karanê Zereyî bi parekerdişê nê dîmenan wazeno çîyêkî binimno. Binê nê parekerdişan de kurdan de heqaret û tehdîtî ameyî kerdene.''