Wextêkî ra nata Îdlîb de krîz dewam keno, Moskova û Anqara roja pancşemeyî pare kerd ke înan bira adirbirnayîşî girewta. Verê cû zî bira adirbirnayîşî amebî girewtene la nêamebî caardene. Hetê bînî ra wexto ke rejîmî dabi leşkeranê tirkan ro Erdoganî reyna multecîyî sey çeke vera Ewropa xebitnayî û verê multecîyan da sînorî. Hetkarê Hemserekanê HDPyî yê Têkilîyanê Teberî ra Berpirsîyar Hîşyar Ozsoyî na rewşa trajîke ercnaye.

Ozsoyî vat: ''Erdogan multecîyî sey çeke xebitnayî la nêeşkîya netîce bigêro. La Ewropa vera naye tewirêko xurt mojna. Sey verî xurt nêba zî karta multecîyan hema zî destê Erdoganî de ya ke vera Yewîya Ewropa xebitneno.

Hetê paştdayîşê DYA ra zî Erdogan têna mend. Ne Pentagon ne zî Kongre paştî danê Erdogan. DYA wazena Tirkîya kaş bikera terefê xo. La ganî seba naye Tirkîya babeta S400an de gamêke apey bierza. Eke wina bo DYA seba weşkerdişê têkilîyan do xîret bikera. La eke Tirkîya gamêke apey nêerza û goreyê waştişê DYA vera Rûsya tênêgêra o wext DYA do zor bida Tirkîya.

Erdogan vera Ewropa gefêko pîl wend. Netîceya nê gefî seba ci do îflas biba. Tirkîya û Erdogan polîtîkaya vera kurdanê Rojawanî de têna mendî. Hînî DYA zî bi hawayêkê eşkerayî paştî nêdanê nînan. Pêro dezgehî vera Erdoganî yê. La welatê Ewropa nêwazenê ke Erdogan bikerê dişmenê xo.

Erdoganî babeta şantaj û gefwendişî de zaf gamî eştî coka warê dîplomatîkî de do çin bibo. Rewşêka winasêne de hetê leşkerî ra Tirkîya û Rûsya vera yewbînan têgêrenê Ewropa terefê xo nêmojnena. No zî seba Erdoganî giran o. Erdoganî xîret kerd ke nê hêzî vera yewbînan bixebitno labelê no sîyaset hînî qedîya. Coka Îdlîb de hetê leşkerî, sîyasî û dîplomatîkî ra bin keweno.''