Berpirsîyarê Karê teberî yê HDPyî û Hetkarê Hemserekê ci Hîşyar Ozsoyî derheqê hêrişanê dewleta tirkî yê hemverê Kobanê û Girê Spîyî de ANFyî rê qisey kerd.

 ‘XOVERDAYÎŞÊ KOBANÊ BI UMÎD’

Ozsoyî vat hêrişê dewleta tirkî nênê qebûlkerdene û çeteyê DAÎŞî yê ke sey nêbinkewte ameyêne zanayene derbeyê cidîyî xoverdayîşê Kobanê de werdî.

Ozsoyî vat Kobanê û Girê Spî bi mucadeleyê xo dinya rê benê umîd. 

Ozsoyî ard ziwan ke rolo ke Kobanê girewto xo ser tarîxê Rojhelato mîyanên de vernîya vurayîşêkê pîlî akerda.

Ozsoyî wina vat: “Eke bêro şima vîrî gama Erdoganî tesîrê Kobanê dîyî vat ‘ma do nêverdê krîzêko newe yê Kobanê virazîyo’ û a roje ra nata tim hêriş keno.” 

 ‘BEWLÎ YO KE ÎNAN BI HÊZO KE KOMBÎYAYÎŞÎ RA GIREWT HÊRIŞÎ DAYÎ DESTPÊKERDENE’

Ozsoyî ard ziwan ke destpêkerdişê hêrişan dimayê Kombîyayîşê Çarhetî ra yo ke roja 27ê Teşrîna verêne de Stenbol de ame viraştene tesaduf nêyo û vat: “Bewlî yo ke înan bi hêzo ke kombîyayîşî ra girewt hêrişî dayî destpêkerdene.”

Ozsoyî dewamê ci de vat: “Tewrbîyayîşê Almanya û Fransa yê kombîyayîşê seba qebûl nêkerdişê binkewtişê rojawanî yê hemverê Rûsya û Esadî yo. Bifikrê eke Îdlib zî hetê rejimê Sûrîye ra bêro girewtene do se bo? Ê do şer bi temamî qezenc bikerê. Fransa û Amerîka wazena vajo ke hewna şer nêqedîyayo. Almanya rê zî problemo pîl meseleyê multecîyan o.”

 ‘SEBA KE PÊKERDIŞ NÊVIRAZÎYENO NÊVERDANÊ KE ŞER BIQEDÎYO’

Dewamê qiseykerdişê xo de Ozsoyî vat: “Trumpî aşma Hezîrane de kombîyayîşo ke Helsînkî de amebi viraştene de Putînî ra waşt ke Îranî Sûrîye ra vejo, Rûsan zî vat ‘ma fikaranê şima fam kenê, la no mumkun nêyo.’ No zî ramojneno ke rojavanê Sûrîye ser o bazarîyî hewna nêqedîyayê. Tirkîye meselaya Îdlibî de seke yeno îdîakerdene aktoro sereke nêya. Seba ke mabênê hêzanê pîlan de pêkerdiş nêvirazêno nêverdanê ke şer biqedîyo.”

 ‘HÊRIŞÎ TEŞEBUSÊ VERNÎROCIGIREWTIŞÊ QEDÊYAYÎŞÊ DAÎŞÎ YÊ’

Ozsoyî ard ziwan ke o tewrê fikrê endamê Komîteya Dîplomasî yê Têgêrayîşê Komelê Demokratîkî (TEV-DEM) Salih Muslîmî yê sey ‘nê hêrişî do emrê DAÎŞî derg kerê’ beno û vat: “Çi gama ke QSD hêrişê DAÎŞî keno Tirkîye zî kewena mîyanê têgêrayîşî û hêrişê Rojava kena. Amacê nê hêrişanê Tirkîye zî vernîya qedîyayîşê DAÎŞî girewtiş o.”

 ‘EKE REAKSÎYONÊ XURTÎ NÊRÊ RAMOTENE BENO KE HÊRIŞÎ AÇARÎYÊ ÎŞXALÎ’

Ozsoyî ard ziwan ke hukmatê Erdoganî nika bi nê hêrişan wazeno ke reaksîyonan pêmawo û hetê Amerîka ra nêvajîyayîşê vatişêkê cidîyî yê hemverê nê hêrişan zî manîdar o û wina dewam kerd: “Eke kes vajo Kombîyayîşê Çarhetî de bazarîyî ameyî kerdene do no spekulasyonêk ra wetêr çîyêk nêbo. La na raştîyêk a ke Tirkîye bi nê hêrişan wazena reaksîyonê Fransa û Amerîka pêmawo. Eke reaksîyonêkê cidîyî nêramojnê do nê hêrişî açarîyê îşxalî.”

 ‘HADREYÎYA HÊRIŞÊ HEMVERÊ ROJAVA’

Peynîya qiseykerdişê xo de Ozsoyî vat: “Tirkîye hadreyîyan kena ke hêzanê hemverê rejimê Esadî cayêk de biyaro pêser û hêrişê Rojava bikero. Erdogan bi nê têgêrayîşî do bikewo mîyanê sîlikêka hîna xorîye. No hal do tesîrêkê xirabî têkilîyanê kurd û tirkan bikero. Tirkîye seke Efrîn de kerd beno ke hêzanê pîlan hetê eskerîye ra îkna bikero û Rûsya bigîro hetê xo û sewbîna cayan zî îşxal bikero. Labelê hewna ke Rojhelato mîyanên de û keyeyê aye de meseleyê kurdan esto no têgêrayîş do sey bumerangî agêro bigino aye ro.”