Koordînasyonê PAJK’î derheqê kesanê ke seba şikîyayîşê tecrîdê serê Rayberê Şarê Kurdî Abdullah Ocalanî çalakîya fedaîye kerdê eşkerayîya nûştekîye daye.

PAJK’î vat, “Çalakwanê grevê vêşanîye yê bêagêrayîşî bîyê îfadeyê bêsînorîya îradeyê merdimî.  No veng û tewiro ke zîndanan ra û teber ra beno berz hendî çalakîyêk ra vejîyayo, bedenê merdimîye de bîyo newe ra ganebîyayîşê xeta xoverdayîşî ya tarîxîye.   Merheleya ke ma tede yê îqtîdarê AKP’yî yo faşîst, medyaya şerê taybetî bêvengîya mergî pawenê, hemverê mergan de tena temaşe kenê û nê sey konseptêkê sîyasîyî domnenê. Hemrayê ma Zulkuf Gezen, Ûgûr Şakar û Ayten Beçet a ke seba şikitişê na bêvengîya mergî çalakîya fedaîye viraşte ma înan bi hurmet û minet bi vîr anê. Ma keyeyanê hemraye Ayten Beçete û Ûgûr Şakarî rê û şarê Kurdistanî rê serweşîye wazenê. Ê bîyê nameyê gireyo nêvisyaye yê xoverdayîşî û îradeyê hemverê zulmî.”

No her ca de vengdayîşê çalakîye yo

PAJK’î eşkerayîya xo de bale ante nê xusûsan ser: ''Na çalakîya ke hemverê tecrîdî de bi hemrayanê ma Leyla Guvene û Nasir Yagizî bî sembol û ewro hemeyê zîndanan de, Kurdistan de û teberê welatî de vila bîya, deynê wijdanî, exlaqî û sîyasî yê heme cinî, ciwan û hêzanê demokratîkan o ke ma na çalakî açarnê azadîya cimatkîye.  Çalakîya hemra Ayten Beçet a tepişteya PAJK’îye ke Zîndanê Gebze de çalakîya fedaîye kerde, seba heme cinîyan û şarê ma vengdayîşê bi çalakîye yo. Dewleta Erdoganî ya ke çalakîye ra tersaya cenazaya hemraya ma Ayten Beçete remnaya. Hemverê heme şidetê dewleta Erdoganî ya faşîst û dîktatore şarê ma wayîrê qerardarîyêka tame yo ke şehîdanê xo rê wayîr vejîyo.  Hêzo tekane yo ke polîtîkayanê îqtîdarê AKP’yî yo faşîst û sere de yê Almanya yê dewletanê Ewropa ke serê menfaetî de ronayê veng vejo şar bi xo yo.   Rayîrê ciwînayîşê şehîdanê ma yê ke abîdeyê xoverdayîşî yê resnayîşê na çalakîye bi serkewtişî yo. Şehîdê ma yê berzî û bi desan hemrayê ma yê ke çalakî domnenê serkewtişê çalakîya xo nika ra bi îradeyo ke ramoto îspat kerdo. hemrayanê ma yê ke bedelanê hende giranan rê amade yê wedarîyayîşê tecrîdê serê Rayberîya ma yo û resayîşê ê yê heqanê xo yê xozayî û unîversalan o.  Serkewtişê na çalakîye sere de keweno serê doşê ê kesanê ke teber de yê. Çalakwanan vateyê xo bi tewir û qerardarîya xo ramotê. Hendî derheqê çalakîye de vateyo ke ma vajê no yo ke ma bi hawayêkê girseyîyî çalakîyan her ca de vila bikerê. Şehîdê ma yê ke wayîrê na çalakîya tarîxîye yê fermanê ma kenê ke ma her cayê Kurdistanî de û teberê welatî de na çalakîye rê wayîr vejîyê û aye biresnê merheleyêka newî. 

Ma do xoverdayîşî bi ser bifînê

Şaro ke 8’ê Adare de û Newroze de vejîya meydanan gureyê înan o ke bi hawayêkê hîna aktîfî tewrê prosesî bibê. Grevê vêşanîye yo bêdem-bêagêrayîşo ke heme wareyanê xoverdayîşî de seba cuya xoverdayoxan hendî resayo dereceya krîtîke rîskê cuye esto hendî. Naye ra her ca de ganî bi serkêşîya cinî û ciwanan bi şîarê ‘MA CUYE RÊ WAYÎR VEJÎYÊ, TECRÎDÎ BIŞIKNÊ’ çalakîyan biaçarnê hemleyêka newî. Wayîrvejîyayîşê cuya çalakwanan ancax bi qedînayîşê tecrîdê serê Rayberîya ma mumkun o. Na mesuldarîyêka ma ya merdimî, exlaqî, wijdanî û sîyasî ya.Ma ancî Leyla Guvene, Nasir Yagizî, Fadîle Toke, heme tepişteyanê PAJK-PKK’yîyanê ke zîndanan de yê, xoverdayoxanê Almanya, Strasbourg, Hollanda, Îngilistan, Galler, Kanada û Awusturya bi hurmet silam kenê, soz danê ke ma do xoverdayîşî biresnê serkewtişî.”