Hetkarê Hemserekanê HEDEPî yê Berpirsîyarê Komîsyonê Rêxistinîya Merkezî Vezîr Coşkun Parlakî ANFyî rê qisey kerd û îfade kerd ke çarçewa xeta tradîsyonê sîyasî yê kurdan de ê do vengê şarî biresnê warê sîyasîyî.

Parlakî îfade kerd ke HEDEPî mîrasê têkoşînî yê partîyanê kurdan û paradîgmaya HDPyî xo de yew kerdê û vat: ''Karê ma yo sîyasî no yo ke kurdî azad bibê û wayîrê yew statuyî bibê. Nîqaşê serê Qanûnê Bingeyîy ê neweyî do dest pêbikerê. Sey HEDEPî ma amade yê ke seba qanûnanê demokratîkan û têdûştan têkoşîn bikerê. Meseleya tecrîdî seba ma meseleyêka tewr girîng a. Tecrîd çend dewam bikero meseleya kurdan zî hende giran bena. Şarê kurdî Birêz Ocalanî sey îradeyê xo vîneno. Coka erkê ma yo ke ma na babete berê Meclîsî. Heta ke tecrîd wedarîyo û Birêz Ocalan azad bibo ma do têkoşîn bikerê.''

Parlakî bale ante weçînayîşanê herêmîyan ser û vat: ''HEDEP bi hawayêkê fermîyî sey partîyêka newîye ameye awankerdene. La tecrubeyê ma yê sîyasîyî û tradîsyonê têkoşînê ma kahan ê. Ma do bi lezî dest pê xebata weçînayîşanê herêmîyan bikerê. Hemşaredaranê heta endamanê meclîsanê şaredarîyan ma do pêro namzetanê xo goreyê meylê şarê xo dîyar bikerê. Ma do şarê xo yekser tewrê prosesê weçînayîşan bikerê. Ma do şarê xo reyde ser bikewê û peynîya rejîmê qeyûman bîyarê.''