DBP, Partîya Komunîste ya Kurdîstanî (KKP), Partîya Azadîye, Partîya Însan û Azadîye (PÎA), Komeleya Kurdan a Şorişgêre û Demokrate (DDKD), Komeleya Şêx Seîdî û Platformê Yewîya Cinîyan ê Kurdan derheqê hêrişanê vera Rojawanê Kurdîstanî de eşkerayîyêka hempare daye. Hemsereka DBPyî Çîgdeme Kiliçgun Uçar û temsîlkarê partî û dezgehanê bînan zî tewrê eşkerayîye bîyî. 

Endama Heyetê Rayberdişê Merkezî yê DBPyî Bêrîvane Helen Işik eşkerayîye wende. 

Metnê bi sernameyê ''Pawitişê Rojawanî caardişê yewîya neteweyî yo'' de ame vatene ke rejîmê Sûrîye 14 serran ra dima rijîyayo û ganî hinî Sûrîye de rejîmêko demokratîk bêro awankerdene. 

Metn de bale ameye antene hêrişanê dewleta tirke ser û wina ame vatene: ''Tirkîya nê çend hewteyan de hêrişê xo yê vera Sûrîye û rojawanî zêdînayî. Tirkîya seba ke meseleya kurdan çareser nêkerda kena ke polîtîkaya red û înkarî vilayê her cayî bikera. Tirkîya wazena ke Rojawanî îşxal bikera û seba ney zî cerganê cîhadîstan şuxilnena. Tirkîya nêwazena ke kurdî bibê wayîrê statuyî û heqan. 

Statukoyo ke înkarê kurdan ser o ronîyayo ewro ho rijîyeno. Rixmê pêro hêrişan zî Rojawan de serkêşîya cinîyan de modelê cuya têdûşte est a. La yeno waştene ke no sîstem bêro çinkerdene. Hinî tehamulê kurdan bêstatubîyayîşî rê nêmend. Koalîsyonê dewletanê ke kurdan rê statu nêaştêne ho rijîyeno. Statuyê Rojawanê Kurdîstanî seba ma serê her çî de yo. Coka ma venga pêro kurdan danê ke seba statuyê Rojawanî xîret bikerê û yew bibê.

Ma venga rayaumûmîya mîyanneteweyîye zî danê ke parçebîyayîşê Kurdîstanî û bêstatutîya şarê kurdî sebebê krîzanê Rojhelatê Mîyanênî yo. Coka ganî heqê kurdan bêrê şinasnayene. Seba ney zî sey partî, dezgeh û sazgehanê kurdan ma venga rayaumûmîya mîyanneteweyîye danê ke paştî bidê Rojawanê Kurdîstanî. 

Ma venga îqtîdarê Tirkîya danê ke statu û heqanê şarê kurdî qels mekero. Ganî Tirkîya paştî bida Rojawanê Kurdîstanî û tede têkilîye rona.

Bi na wesîle ma vanê ke roje roja pawitişê statuyê Rojawanî ya. Bêrê ma pîya Rojawanî bipawê.''