Sereka Federasyonê Rojnamegeran ê Mîyanneteweyîyî (IFJ) Dominique Pradalie derheqê qetilkerdişê Nazim Daştan û Cîhane Bîlgîn de ANFyî rê qisey kerd.

Dominique Pradalie pare kerd ke ê verê qetilkerdişê Daştan û Bîlgîne de mat mendê û vat: ''Nê qetilkerdişî sûc û binpaykerdiş ê. Ma keyeyanê wird rojnamegeran rê serweşîye wazena û ma tim hetê înan de yê. Ganî edalet bêro caardene û qetilkerdişê wird rojnamegeran bêro cigêrayene.

Teyna Tirkîya ney Îsraîl zî wina rojnamegeran qetil kenı. Çunke nê dewletî wazenê sûcanê xo binimnê. Hêriş û kiştişê rojnamegeran sûcê şerî yê. La dewleta tirke bi hawayêkê bêperwayî rojnamegeran kena hedef. Artêşa tirke sey mafyayanê Meksîka rojnamegeran kena hedef. Tirkîya sey Îsraîlî seba heman armancî rojnamegeran kena hedef.

Ganî Tirkîya bêra muhakemekerdene. Eke wina nêbo nê hêrişî do dewam bikerê. Rojnamegerê kurdî raşta zî qehreman ê ke mîyanê zehmetîyan de xebitîyenê. Ma nînan fîraz kenê. Rojnamegerê kurdî seba pêro dinya mîsal ê.''