Parlamenter û rayberê Partîya Çepe ya Swêdî, mektubêk Serokkomarê Tirkî Recep Tayyîp Erdoganî rê şawite û ci ra waşt, seba wedaritişê tecrdîkerdişê Rayberê Şarê Kurdî Abdullah Ocalanî bikewo mîyanê têgêrayîşî.
Hîrê serekanê qedemeyan ê Partîya Çepe ya Swêdî mektubêka akerdeyî Serokkomarê Tirkî Erdoganî rê şawite û da zanayene ke, cuya çalakgeranê grevê vêşanîye merheleya krîtîke de ya.
Partîya Çepe Erdoganî ra waşt, seba ke vernîya merdişê merdiman bêro girewtene û waştişê çalakqeran bêro qebûlkerdene, bi amancê wedaritişê tecrdîkerdişê Ocalanî bikewo mîyanê têgêrayîşî.
Serekanê Partîya Çepe ard vîrî ke, grevê vêşanîye yê parlamentera HDP'yî Leyla Guvene kewto roja 190’ine û vat, “Grevê vêşanîyê xeylî hepisxaneyanê Tirkîya de û welatanê Ewropa de vila bîyî. 30 tepişteyanê sîyasî grevê vêşanîye bedilna rojeyê mergî. Seba wedaritişê tecrdîkerdişê Rayberê Şarê Kurdî Abdullah Ocalanî grevê vêşanîye de yê. Hetê her kesî ra yeno zanayene ke waştişê înan o yo ke wa Ocalan avûkat û keyeyê xo binîzamî bivîno.”
Mektube de ame vatene, pêvînayîşê avûkatan bi muwekîlanê xora heqê huqûqî ê ke temamê dinya de ameyo qebûlkerdene û da zanayene ke, 7 hezar tepişteyan cuya xo eşte mîyanê rîskî, dest bi grevê vêşanîye kerdo û înan ra 7 kesan zî seba wedaritişê tecrîdî cuya xo vîndî kerda.
Serekanê Partîya Çepe vat, “Şima Serekêkê sîyasî yê, coka karê şima yo verên ganî pawitişê cuya hemwelatijan bo” û Erdoganî ra waşt seba wedartişê tecrdîd bikewo mîyanê têgêrayîşî û pêvînayîşanê aşitîye newe ra bido destpêkerdene.
Parlamenter Malîn Bjork, Håkan Svennelîg û Berpirsîyara Têkilîyanê Mîyanneteweyî yê bajarê Uppsalayî Yekbûn Alpe morê xo da binê mektube ro.
