Komîsyonê Zîndanî yê Komela Heqanê Merdiman (ÎHD) ê Amedî şi serdanê domanê bi nameyê F.T.yî (16) ke roja 1ê Teşrîna peyêne de zîndanî de raştê îşkenceyê gardîyanêk amebi.

Pêvînayîş de F.T.yî ard ziwan ke roja 1ê Teşrîna peyêne de gama ke ê kitab wendo gardîyanêk qirika ci şidênaya, o tehdît kerdo û waşto ke ê bifetesno. Selahîyetdaranê ÎHDyî ard ziwan ke F.T.yî çîyê ke ameyê serreyê ci mudurê zîndanî rê zî qal kerdê, gerreyê ê gardîyanî kerdo û raporê kuwayîşî girewto. Dewam de ame vatene ke ê pêhesîyayê ke hema zî gardîyan gureyê xo rê dewam keno.   

ÎHDyî Serdozgerîya Zîndanî rê pêhesnayîşê sûcî kerd. Pêhesnayîşê sûcî de nê îfadeyan rê ca dîya: “Gama vatişê muracatkero doman yo tepişte F.T.yî bigîrîyê verê çiman merdim vîneno ke personelê sazîye hemverê tepişteyî de îşkence û muameleyê xirabî yê hem fîzîkkî û hem zî psîkolojîkî kerdo. Kerdişê îşkenceyî yo ke sûcêkê hemverê merdimayî de yeno zanayene, hem giranîya ci û hem zî îdîaya memurê pawitişî yê înfazî yo ke kerdoxê nê îşkenceyî yo hewna gureyê xo rê dewam keno ganî bi hawayêkê bidetayî bêro cigêrayene û eke delîlî estê bi lezabez bêrê arêdayene.”