Parlamenterê HDP’yî yê Edene Kemal Pekozî  ard ziwan ke hukmatî bi zanayîş şer û tecrîd vîjnayî û vat heta ke tecrîdê serê Rayberê Şarê Kurdî Abdulah Ocalanî mero wedartene haştîye û hûzûr nênê welat.

Avûkatanê Rayberê Şarê Kurdî Abdullah Ocalanî yo ke Îmrali de binê tecrîd de yeno tepiştene, Newroz Ûysale, Cengîz Yureklî, Faîk Ozgur Erol û Mazlûm Dînçî seba ke muwekîlê xo dir pêvînayîş bikerê perey reya 14'ine muracatê Serdozgerîya Komare ya Bûrsa kerd. Avûkatan Rêzan Sarica û Newroz Ûysale  badê 8 serran 2 û 22’ê Gulane û 12 û 18’ê Hezîrane û 7’ê Tebaxe de Ocalanî dir pêvînayîş viraştbi. 7'ê Tebexa ra nate destûr nêdîyeno ke avukatî Ocalanî dir pêvînayîş virazê. Muracatê keyeyan zî bi behaneyê cezaya disîplînî ya hîrê mendan ame redkerdene.

Parlamenterê HDP’yî yê Edene Kemal Pekozî ANF’yî rê babete ercna. Pekozî vist vîrî ke bi grevê vêşanîye tecrîd amebi şiktene û va: ‘‘Hukmatî waşt ke şiknayîşê tecîrîdî goreyê xo bişuxulno û reyanê Kurdan bigêro la no waştişê înan nêame ca, coka înan reyna test bi tecrîdî kerd. Vernîya Tirkîya de di rayîrî estê. AKP yo ke her hetî ra tengayî anceno ya bi pêvînayîşan rayîrê haştîye akeno ya zî şerî keno xorî. Gama ke Birêz Ocalan qisey keno, mesaj dano Tirkîya nefes gene. La AKP-MHP hûzûr nê şer wazeno. Gamê ke do cuwa ver biameyêne eştene nêameyî eştene. Eke sozê ke ameybî dayene biamêyene caardene nika Tirkîya bibî asan. Îqtîdarî hendî sucê girdî kerdî ke, zanê ke netîceyê înan do giran bê. Nê semedî ra heta eşkenê emrê xo kenê derg ke  wa hesabdayîş hîna erey bikewo. Hukmat  zano ke sey her keso ke zîndan de yo heqê Ocalanî zî yê pêvînayîşê keye û avûkanê ci esto.  Xora rolê Ocalanî yeno zanayene. Tesîrê ci serê Ewropa, Rojakewtena Mîyanêne û Tirkîya esto. heta ke tecrîdê serê Ocalanî mero wedartene haştîye û hûzûr nênê welat. Semedê holeya heme hetan ganî tecrîd cade bêro wedartene.‘‘