Senatorê Koma Hemwelatîyan a Komargere û Komunîste ya Fransa Pierre Laurent hewteyê vîyarteyî de roja çarşemeyî hêrişê îşxalî yê dewleta tirke yê vera Başûrê Kurdîstanî vistî rojdemê Senatoyê Fransa. Pierre Laurentî persa ke Fransa Kombîyayîşê Berzî yê NATOyî ra verî derheqê hêrişanê Tirkîya yê vera Başûrê Kurdîstanî de tawîz da yan yanê.

Laurentî vat: ''Tirkîya de tedaya vera demokrasî her wextî ra giranêr a. Rojnameyê Figaro de weşanîya ke Fransa Kombîyayîşê Berzî ra verî 14ê hezîrane de tawîzan bida Anqara. Nîsane ra nata Herêma Kurdîstanî de bombardumanê giranî estê. NATOyî seba nê hêrişan destûr da Tirkîya. Çira Fransa û endamê bînî yê NATOyî vera nê hêrişan hende bêveng ê? Wezîrê ma Wezîrê Tirkîya reyde çi qisey kerd? Fransa vera hêrişanê Tirkîya tewirêkê senînî do bigêra? Partîya Komunîste seba paştî bida Başûrî 14ê hezîrane de do şora Hewlêr. Ez zî înan reyde û dostanê xo yê kurdan reyde şora.''

Sekreterê Wezîrê Karanê Teberî Clemenete Beaune cewab da persî la derheqê Başûrê Kurdîstanî û îşxalî de vateyêk zî nêkerd. Clement vat: ''Kombîyayîşê Berzî de waştişê Fransa ser o ma de meseleya Tirkîya newe ra biercnê. Menga kanûne de waştişanê ma yê Konseya Ewropa ra girewtişê tedbîran bi. Meseleya Dengizê Sipî de dîyalogan dest pêkerd.

Ma her tim amade yê ke Tirkîya reyde dîyalogan bikerê la ganî Tirkîya alozîyanê Dengizê Sipî, Lîbya û Asya kêm bikerê.''

Nê cewabî ra dima  persê 'Gelo şima bedelê pêkerdişê Rojhelatê Dengizê Sipî û Lîbya de do kurdan bikerê qurban?' bêcewab mend.