Pêvînayîşê Pêşnîyaza Qanûnê Butçe ya Îdareyê Merkezî ya 2024î Komîsyonê Plan û Butçe de dewam kenê. Kombîyayîşê Wezîrîya Perwerdeyê Mîlî yê Tirkî de wekîlanê HEDEPî seba ke semedê kurdkî û ziwananê bînan çime cîya nêbîyo na rewşe protesto kerd. Wekîlî bi dovîzanê “Perwerdeyê ziwanê dayîke heq o”  kewtî salana kombîyayîşî. Wekîlan wedaritişê werdê bêpereyî yê cemêkî yê dibistanan zî bi dovîzê “Cemêkê werdî heq o” protesto kerd.

Wekîlê HEDEPyî yê Êlihî Zeynepe Oduncu û ya Îzmîrî Burcugule Çubuk derheqê sebabanê çalakîya xo de ANFyî rê qisey kerd.

Zeynepe Oduncu bale ante krîzanê ke şar tira nêeşekeno nefes bîgêro ser û vat,  ''Îqtîdar bi polîtîkayanê şerî têna goreyê menfeatê xo têgêreno. Şar xeymê ci de nîyo. Semedê perwerdeyî zaf tay butçe ame cîyakerdene. Mekteban de wendekarî bêçareyîye ra ganê xo gênê. Xora keyeyê ke feqîr ê, şertanê zehmetan de domananê xo şawenê mekteban. Rîyê pereyê werd, cayê mendişî û kitaban ra mekteb yeno caverdayene.  Coka ma wazenê ke wa mekteban de werdo, bi weşî, qîmkerde û bêpere bêro dayene. Xora perwerdeyê ziwanê dayîke zî heqêko merdimî yo  û heqo tewr esasî yê kurdan o. Ma wazenê ma perwerdeyê kurdkî bêro dayene. Coka ma pêvînayîşanê butçe de çalakîye kerde.''

Burcugule Çubuk zî ard ziwan ke butçeya 2024î de wina yeno mojnayene ke çew vano qey qet enflasyon, vêşanîye, feqîrîye, bêkeyeyîye, întîharê ciwanan, qirkerdişê cinîyan û şer çîn o. Çubuke nê  vatî: ''Gama ke qala bajaranê kurdan bêna, benê gej la vatişê demokrasî û seyyewbînîye feqê xo ra warnêdanê. Goreyê na butçe ma û îtîfaqê AKP-MHPyî eynî welat de nêciwîyenê. Qet qala raştîyan nîna kerdene.  perwerdeyê ziwanê dayîke û mekteban de werdê cemêkî yo bêpere pabesteyê yewbînan ê. Îqtîdar nêeşkeno înan  bikero vera yewbînan û îdare bikero.''