Wekîla Partîya Sosyalîste ya Swîsre ya ke paştî dana Hemleya Azadîye, Laurence Fehlmann Rielle derheqê pêvînayîşê bi Rayber Apoyî û mesajê ci de ANFyî rê qisey kerd.

Laurence Fehlmann Rielle ard ziwan ke pêvînayîşê bi Rayber Apoyî zaf muhîm o û nê vatî:  ''Abdullah Ocalan wayîrê heqê serbestveradayîşî yo la 25 serrî yo binê tecrîdî de yeno tepiştene. No pêvînayîş nîşanê destpêkerdişê dîyaloge dewlete yo? Tesîrê Abdullah Ocalanî kurdan ser o zaf o û semedê prosesê haştîye fîgurêko kilît o. Ma nêzanê Omer Ocalan sey birarzayê ci ya zî sey temsîlkarêkê DEM Partî pêvînayîş kerd. Senî beno wa bibo pêvînayîş gamêka muhîm a. Goreyê mi Abdullah Ocalanî bi mesajê xo waşt verê muzakerayan abikero. Abdullah Ocalan tepişte bi zî tesîrê ci serê kurdan de zaf o. Abdullah Ocalan tim semedê haştîye zor dano îqtîdarî.

Beno ke rewşa dina ya bêîstîkrare zî sebebê pêvînayîşî yo. Beno ke Tirkîya ser o zext est o. Ma biewnî dewamê pêvînayîşî yeno ya nê. Nê ra çîyêko pozîtîf vejîyeno ya nê. Seba ke na tengayî ra bêro vejîyayene her qeyde cehdkerdiş do feyde bikero. No şer ne semedê kurdan û ne zî semedê tirkan qezenc o. Netîceya têkoşînê kurdan de ewro hukmat reyna wazeno ke Abdullah Ocalanî reyde pêvînayîş bêro kerdene.

Rixmê heme hêrişanê dewleta tirke yê vera Rojawanî şarê kurdî qerardar xover dano û haştîye wazeno. Kurdê ke Ewropa de ê zî semedê azadîya Abdullah Ocalanî tim çalakîyan kenê. Bitaybetî 2023yî ra nata çalîkîyê xurtî kerdî ke tesîrê înan zaf o. Pêvînayîşê Abdullah Ocalanî zaf muhîm o la qîm nêkeno ganî Ocalan bibo azad. Coka ganî kampanyaya azadîya ci ya dinya bêro xurtkerdene. Bi azadîya Abdullah Ocalanî meseleya kurdan eşkena bêro çareserkerdene û verê xoserîye abikero.''