Raportora Tirkîya ya Parlamentoyê Ewropa Katî Pîrî şîye serdana Huseyîn Yildiz û Hasbî Çakici yê ke 122 rojî yo bajarê Haagî yê Hollanda de vera tecrîdkerdişê Ocalanî grevê vêşanîye de yê.
Weçînayîşê seba Parlamentoyê Ewropa yê Hollanda 23'ê Gulane de do bêrê viraştene. Katî Pîrî ya ke newe ra bîya namzede, şîye serdana çalakgeranê grevê vêşanîye Huseyîn Yildiz û Hasbî Çakiciyî.
Pîrî demê serdane de vat, “Seba ke pîyê mi zî sey bextwaştoxêkê sîyasîyî ame Hollanda, ez zana ke şert û mercê bextwaştoxîye çiqas giran ê, coka ez têkoşînê şima baştir fam kena. Parlamento de ez do têkoşînê xo yê seba heqanê merdiman û demokrasî dewam bikera. Wexto ke şîya serdana Amed û Mêrdînî mi dî ke zirarêko senên ê cayan rê ameyo dayene.
Ganî dewleta Tirkî biba welatêko demokratîk. Rayîrê ney zî bicaardişê waştişanê şarê Kurdî yo. Senî ke mi verê cû zî kerd, eke rayêka bîne seba parlamentoyî bêra weçînayene ez do têkoşînê xo yê seba demokratîkbîyayîşê Tirkîya dewam bikera. Paştdayîşê şima yo ke şima seba weçînayîşî danê mi xeylî gird o. Kuçeyan de merdimî yenê mi ra vanê, ‘Kurdî ameyî leyê mi û seba to paştdayîş waşt’. Ez nê vatişan xeylî heşnena. Seba waştişanê hevalanê ke grevê vêşanîye de ez do têkoşîn bikera. Seba paştdayîşê şima ez şima rê zaf sipas kena. Ez do têkoşînê xo yê seba azadîya Kurdan û demokratîkbîyayîşê Tirkîya Parlamentoyê Ewropa de dewam bikera.”
Çalakgerê grevê vêşanîye Huseyîn Yildiz û Hasbî Çakici zî seba serdana Pîrî, Pîrî rê sipas kerd.
