Wekîla Partîya Çep a Keske ya Adana Tulaye Hatîmogullari derheqê serrgêra 8. ya Qirkerdişê Pirsûsî de ANFyî rê qisey kerd.

Tulaye pare kerd ke bingeyê Qirkerdişê Pirsûsî 2015 de erzîyayo û vat: ''Îqtîdarê AKPyî wexto ke bira vurnayîşê rejîmî daye seba ke împaratorîya tersî awan bikero tedaya komelî kerd. Qirkerdişê Pirsûsî ra dima qirkerdişê bînî ameyî kerdene. La seba ke şar nêvejîyo kuçeyan, nêameyî pêser û xo ver nêda. Sey zîncîrê qirkerdişanê plankerdeyan bi. Mîsal eke no krîzo ekonomîk-vaybîyayîş Qirkerdişê Pirsûsî ra verî biqewimîyayêne protestoyê pîlî do biameyêne kerdene. La hukmatê wextê ê qirkerdişan de pê Rewşa Îstîsnayîye komel girewt binê teda, ters viraşt û verê çalakîyanê sivîlan girewt.''

Wekîle Tulaye Hatîmogullari bale ante ser ke qirkerdişanê sey Pirsûsî de tim kiştoxî bêceza manenê û vat ke ganî vera polîtîkaya bêcezaverdayîşî têkoşîn bêro kerdene. Tulaye vat: ''Eke ma biewnê dosyayanê dewayanê qirkerdişan vînenê ke sîstemê bêcezaverdayîşî û tirsê pawitişî senî şuxilîyenê. Ma ney qetî qebul nêkenê. Ganî ma teyna hesabê ney qirkerdişan bipersê û seba qedîyayîşê kerdşanê faşîstan têkoşînê xo berz bikerê. Ganî ma vera faşîzmî têkoşînêkê yewbîyayeyî bikerê. O çax ma do ser bikewê.''