Platformê Ziwanê Kurdkî qezaya Yenişehîrî ya Amedî de Merkezê Kongre yê Çand Amedî de derheqê zextanê serê ziwanî de eşkerayîye daye. Temsîlkarê rêxitinanê komelê sîvîlî yê ke derheqê ziwanî de xebatan kenê tewrê kombîyayîşî bîyî. Eşkerayîye hetê Vervatoxê Platformê Ziwanê Kurdkî Şerefxan Cizîrî ra ameye wendene.

Cizîrî ard ziwan ke ziwanê kurdkî Vakurkê Kurdîstanî de binê tehlukeyî de yo û vat:'' Ziwanê kurdkî tekîlîyanê komelkî û sîyasîyî de zaf nîno şuxulnayene. Eke no proses wina dewam bikero Vakurkê Kurdîstanî de şarê kurdî do zaf tengayî bianco.''

Cizîrîyî veng da partî û dezgehanê kurdan ke wa xebatanê xo bi kurdkî bikerê û nê vatî: ''Bi vatişê bînî Platformê Ziwanê Kurdkî wazeno ke wa zanayîşê ziwanê kurdkî xebatanê sîyasî û komeklî de bibo krtîrêko bingehî. Çunke no semedê şarê kurdî yew wezîfeyo mîlî yo, ehlaqî yo û bingeyê estbîyayîşê ma yo. Çarçewaya xebatanê Platformê Ziwanê Kurdkî de heta nika vejîya werte ke partî û têgêrayîşê kurdan babeta waştişê ziwan û  heqê neteweyî de eşkenê pîya bixebitê. Hinî polîtîkaya kurdan meseleya  ziwan û heqê neteweyî de bîya yewe. Na raştîye hole yena zanayene. Coka ma pêro pîya sey yew vengî vanê ke; ziwamê kurdkî estbîyayîşê kurdan o, nasname tacê ci yo.''

Badê eşkerayîye de bi sernameyê ''ziwanê kurdkî û qanûnê bingeyî yo newe'' panel ame kerdene.