Komîteya Perwerdeyî ya KCKyî derheqê hêrişanê vera dezgehanê kurdkî de yê ke rojanê peyênan de zêdîyayî, eşkerayîye daye û nê vatî:

''Dewleta tirke ya faşîste û qirkere her warê cuye de vera kurdan hêrişê înkar û îmhayî kena. Rayber Apo binê tecrîdê giranî de yo. Bêşik nêzdîbîyayîşê Rayber Apoyî nêzdîbîyayîşê şarê kurdî yo. Tecrîdê serê Rayber Apoyî û hêrişê vera estbîyayîş, ziwan û kulturê kurdan pabesteyê yewbînan ê. Ewro dewleta tirke vera şarê kurdî şerêkê zaf hetinî rayra bena.  Şarê kurdî hetê sîyasî, ekonomî, komelkî, leşkerî û kulturî ra binê hêrişanê giranan de yo. Vera heme hêrişan Rayber Apo, gerîlayê azadîye û şarê kurdî her warî de xover danê.

Şarê kurdî vera her qeyde hêrişanê îşxal û qirkerdişî milê xo çewt nêkerd, çok nêda. Şarê kurdî hêzê xo Rayber Apo û Gerîlayanê Azadîye yê Kurdîstanî ra geno û bi îradeyê xurtî têkoşînê xo bi xurtkerdişî domneno. Dewleta tirke seserre yo seba ke kurdan, ziwan û kulturê ci yê qedîmî yê bi hezaran serran çîn bikero her qeyde hêrişanê teberê merdimîye kena. Ronayîşê komara faşîste ra nata şarê kurdî xeylêk reyî raştê qirkerdişî ame. Nameyê dewan û bajaran ameyî bedilnayene, nameyê kurdkî ê qijan ameyî qedexekerdene, qiseykerdişê kurdkî her warê cuye ra ame vetene, kincê neteweyî ameyî qedexekerdene, vere her çîyê kurdan dişmenîye ameye kerdene. Bi se hezaran kesî erdê înan ra ameyî raqilnayene, tepişîyayî, kişîyayî , raştê îşkenceyanê giranan ameyî la şarê kurdî teslîm nêbi. Seserrî yo şarê kurdî vera her qeyde qirkerdiş û asîmîlasyonî xover dano. Dewleta tirke seserrî yo ke wazena herra Kurdîstanî îşxal bikero, xo rê bikero welat la heta nika ser nêkewt û do ser nêkewo. Kurdî tim wela xo ra newera benê.

Ewro dewleta tirke, îqtîdarê AKP-MHPyî wazenê heme rengan û vengdan werte ra wedarê. Kenê ke ziwanê kurdkî reyna her warê cuye ra vejê. Kurdkî rê tehemulê înan çîn o. Ziwanê kurdkî rê dişmenîye kenê. Meclîs de hema kurdkî sey 'ziwanêko nîno zanayene' yeno pênaskerdene. Ciwanê kurdan ke deyîranê kurdkî vanê û govende genê yenê tepiştene, seba ke qijê kurdan Zarokîstan de ziwanê dayîke de perwerde vînenî derheqê mekteban, mamosteyan û şaredarîyan de tehqîqat dîyeno destpêkerdene. Nuşteyê hîşyarkerdişî yê kurdkî bi destê çeteyan yenê esteritene. Nika zî dezgeho ke perwerdeyo kurdkî dano, pirtûkxane girewtî û bi desan mamoste û xebatkarê kurdkî û kedkarî destbend kerdî.

Wazenê kurdan çîn bikerê. Ziwan û kultur estbîyayîş û bedenê şarêkî yê.  Eke yew netew ziwan û kulturê xo vînî bikero nêeşkeno cuye û estbîyayîşê xo bido domnayene, çîn beno.  Ganî ma bi hewayêkê qerardarî wayîrê ziwanê xo vejîyê. Ziwanê kurdkî û perwerdeyê kurdkî bikerê warê têkoşînî. Bi wayîrvejîyayîşê ziwan, kultur û nasnameyê xo alaya têkoşînî berze bikerê. Ganî ma vera asîmîlasyonî vejîyê. Ganî ma qijanê xo bi cuyeya kurdkî, kulturê kurdan pîl bikerê.Ganî şarê ma wayîrê ziwan, kultur û ameyoxê xo vejîyo. Ziwanê ma estbîyayîşê ma yo, ganî ma wayîrê estbîyayîşê xo vejîyê. Ganî heme roşnvîr, akademîsyen, nuştox, welatperwer û hêzê demokrasî yê Kurdîstanî û Tirkîya wayîrê ziwan û kulturê kurdan vejîyê.

Wayîrvejîyayîşê kurdkî her warî de bi şuxulnayîşê kurdkî beno. Eke her keye de kurdkî bêro qiseykerdene, her dewe,bajar, cayê karî, meclîs, şaredarî, unîversîte, heme mekteban, bazar, dikan, kafe, televîzyon û radyo de kurdkî bêro qiseykerdene ma faşîzmê îşxalkeran û qirkeran felç kenê. Ma do faşîzmî bi vate, hîkaye û edebîyatê kurdkî bifatisnê. Îqtîdar ziwanê kurdkî ra terseno. Zano ke heta ke ziwanê kurdkî bibo nêeşkeno îradeyê kurdan bişikno. Heta ke kurdî bi kurdkî qisey bikerî, ziwanê dayîke de perwerde bivînê, nêeşkenê kurdan çîn bikerê. Ziwan kok û estbîyayîşê kurdan o. Kenê ke nê ruhî çin bikerê. Ruhe azadî yê kurdan ra tersenê. Şarê kurdî ganî semedê pawitiş û averberdişê kurdkî têkoşînê xo xurtêr bikero. Ganî heme xebatî bi kurdkî bêrê kerdene û her ca de kurdkî bêro qiseykerdene.''