Çaglayanê Îstanbul de polîsan hêna verê edlîye de hêrişê merdimanê tepişteyanê ke wazenê bale biance îşkenceyê zîndanan ser,  kerd.

Polîsan qiseykerdişê Wekîla HDPyî Zuleyha Gulum nîmcet verda, rojnamegerî derb kerdî û Hemsereka HDPyî ya Bahçelîevlerî  Fatma Çatar destbend kerd. Wekîlan xo eşt verê di dayîkan û destûr nêda bêrê destbendkerdene û rixmê hêrişan eşkerayîye daye.

Wekîla HDPyî Zuleyha Gulum vera astenkerdişan û hêrişan hêrsê xo ard ziwan û vat: ''Zîndanan ra her roje vengê qîrayîşî yeno. Merdim û avûkatanê xo rê vanê 'ma do tîya bikişê.' Tepişteyê nêweşî mergî rê ameyî caverdayene. Xora muhakemekerdişo edîl çîn o. Hinî bes o, wa no îşkence biqedîyo. Berpirsîyarê merganê zîndanan şima yê. Ewro nêbo zî şima do siba rîyê nê sûcanê xo ra hesab bidê.''

Wekîlê HDPyî Musa Pîrogluyî zî bale ante rewşa Mehmet Emîn Ozakano ke extîyar û nêweşo giran o û sîyasetmedara kurde Aysele Tugluk ser û vat tepişteyî mergî rê ameyî caverdayene. Pîrogluyî ard ziwan ke ê nêeşkenê vera îşkenceyî bêveng bimanê û vat ê do tim semedê azadîya tepişteyan payan ser bê.