Rixmo janî zî seba mişaganê serrewextî tedbîr nêame girewtene. Mişagê zîretî xeymeyan de pêser û mîyanê şert û mercanê zoran de ciwîyenê. Koçberê Sûrîye, şarê Şirnex, Riha û şaristananê bînan ra mişagî serrewextê wisar û hamnanî de seba xenate yenê Çukurovaya Adana. Nê mişagî xeymeyanê naylonênan de pîya manenê.

Goreyê raporêkî Adana de xeymayanê 2 hezar û 202 de 9 hezar û 600ê ci domanî 15 hezar kesî ciwîyenê. Xeymeyan de zî meseleyê awe, lawabo, hîjyen, ceyran û germbîyayîşî estê. Mişagê ke mîyanê şert û mercanê xiraban de ciwîyenê nêeşkenê heqê xo zî bigêrê. Mişagan da zanayene ke cayanê xebate de vera vîrusê Korona tedbîr nêame girewtene û seba ke berardiş dewam bikero ê dîyenê xebitnayene. 

Mişagê zêbeşî Abdî Yildirimî ard ziwan ke ê nêeşkenê awe bivînê û ê heqê keda xo nêgênê. Mişaga zîretî Yildize Kultur zî îfade kerd ke a domananê xo reyde Sîlopîya Şirnexî ra ameye û yewmîyeya înan 50-60 TL ya. Yildize vat: ''Ma xeyme de 10 kesî pîya manenê. Hewa zaf germ o, xeymî hîna germin ê. Ma neçare yê ke ameyî bixebitê. Ma ceyran cayê bînî ra ancenê û awe zî kanalî ra yan zî çirikanê axpînan ra gênê.''

Mehmet Ozenê rihayîjî zî da zanayene ke o serra 1973î ra nata mişagîye keno û vat: ''Zimistanî xeymeyî pê çamur û varan benê de, serd beno. Hamnan de zî mês û toz esto. Ma seba ceyran muracat kerd la nêdîya ma. Ma awe zî pê pereyan gênê. Vera vîrusê Korona tedbîrêk nêame girewtene. Cayêk nêame dermankerdene. Feqîrî zaf ê,  vanê wa feqirî bimirê. Coka miqatê ma nêbenê.''