Komeleya Kulturî ya Pîr Sultan Abdalî (PSAKD) bi wesîleya serrgêra 25. ya Qetlîamê Gazî eşkerayîyêka çapemenîye kerd.

Eşkerayîya PSAKDyî wina ya:

''12ê adara 1995î de taxa Gazî ya Îstanbulî de cerganê kontragerîlayan ê dewlete hêrişê qehwexaneyêkî kerd. Nê hêrişî de pîrê elewîyan ê bi nameyê Halîl Kaya ame qetilkerdene û 5ê ci giranî 25 kesî birîndar bîyî. Hêrişkeran ramitoxê taksîyo ke xesp kerdbi zî kişt. Nêame eşkerakerdene ke nê hêrişkerî kam ê.

Seba ke hêriş protesto bikerê Îstanbul de û Tirkîya de zaf kesî vejîyayî meydanan. Polîsan hêrişê nê kesan zî kerd û bi desan kesî qetil kerdî. Tarîxê 12-15ê adara 1995î de verê çimanê pêro dinya de bi hemkarîya cerganê kontragerîlayan û hêzanê dewlete vera şarê ma qetlîamêko barbar ame kerdene.

Ma nê qetlîamê bi hemkarîya kontragerîlayan û dewlete verê cû Dêrsim, Gumgum, Çorum û Sêwaz de dîyî. Qetlîamê Gazî û Umranîye dewamê polîtîkaya çinkerdişî ya dewlete yê. La na hîşmendîya faşîste nêeşkîya ma çin bikera. Elewîyî tim estbî û do estbê. Elewîyî sey her timî vera neheqîye hetê mazlûman de têkoşîn kenê.

25 serrî verê cû şarê elewîyan bi hîşmendîya nê mîrasê xoverdayîşî vera zulmî vindert. Bi rojan vera elewîyan hêrişî ameyî kerdene, elewîyî qetil bîyî la sereyê xo nêard war. Kerdoxê Qetlîamê Gazî tewr nêameyî dîyene. Polîsanê kiştoxan rê cezayê zûrayênî ameyî dayene. Dewaya qetlîamî şarê ma rê ameye remnayene. Dima zî berpirsîyaranê nê qetlîamî rê xelate ameye dayene û ê bîyî selahîyetdarê dewlete û wezîr.''

PSAKDî bi hawayêkê pîtî eşkera kerd ke ê do hesabê nê qetlîamî bipersê û nêverdê ke dewa bêra girewtene. PSAKDyî kesê ke Gazî û Umranîye de ameyî qetilkerdene yad kerdî.