Hemsereka şûbeyê Komeleya Pîr Sultan Abdalî (PSAKD) yê Meletî Latîfe Ûlûtaşe, hemserê ci Îbrahîm Ûlûtaş û Hasan Kaya rîyê falîyetanê  Komeleya Paştdayîşî ya Cimatkî ya ke bi Qerarnameyê Hukmê Qanûnî (KHK) ameyebî qefilnayene û parekerdişanê medyaya sosyale ameyî destbebkerdene. Endamê komele Orhan Sever zî seba îfadeyî ame vengdayene. Şûbeyê Komeleya Pîr Sultan Abdalî (PSAKD) yê Meletî derheqê babete de eşkerayîyêk daye û bale ante hêrişanê vera Elewîyan ser.

Komeleya Heqanê Merdiman (ÎHD) Partîya Emeke, Partîya Eciqnayeyan a Sosyalîste (ESP), Partîya Demokrasîya Azadîwaştoxe (ODP) Partîya Komînîste ya Kurdistanî (KKP) û xeylî hemwalatijanê Elewîyan zî paştî daye eşkerayîye. Metnê çapamenîyo ke hetê endamê merkezê PSAKD’yî Mehmet Topalî ra ame wendene  de ca dîya nînan:

Elewîyan Heta Ewro  Çok Nêda Do Ewro ra Tepîya zî Nêdê

‘’Operasyono ke vera endamanê ma ameyo kerdene leteyêkê polîtîkaya zextî ya vera Elewîyan o. Bi sebebo ke rêxistina ma sereberz a timûtûm hedefê îqtîdarî da ya. Heta ewro xeylî îdarekar û endamê ma ameyî destbendkerdene û tepiştene. Yeno famkerdeneke  Meletî de vera rêxistina ma polîtîkayêka hêrişkare ya taybete ya îqtîdarî esta. Cuwa ver zî îdarekar û endamê ma bîlaheq ameyî girewtene. Ewro zî reyna hermsereka şûbeyê ma Lafîfe Ûlûtaşe û endamê ma bîlasebeb ameyî destbesnkerdene.

Rixmê Heme Zext û Qirkerdişan Do Mucadeleyê Ma Dewam Bikero

Ma zaf hol zanê ke embazê ma  bi sebebo ke Elewî  û çepgêr ê û cayê bindestan de ca genê ameyî destbendkerdene. Eşkerayo ke bi nê hêrişan hesabê asîmîlekerdişî yenê kerdene. La nê hesabê leymin ê serdestan do nêtepişê. Ma Elewîyî bi serran o rixmê heme zext û qirkerdişan heta ewro ameyî. Ma rayîrê xo yo raşt nêbedilna. Ma verê zilmî de milê xo çewt nêkerd û vera nêheqîye bêveng nêmendî.  Ma sey Pîr Sultan Abdalî heta ewro senî vera zextan çok nêda do ewro ra tepîya zî nêdê û mucadeleyê xo rê dewam bikerê. Bedelê ci çi beno wa bibo ma do rayîrê xo rê dewam bikerê. Vera zilmî milê xo çewt nêkerê û çirey teslîm nêbê.’’