Roşnvîrê kurdan rojnameger-nuştox Mûsa Anter bi vatişê kurdan Apê Mûsa, 26 serrî cuwa ver hetê JÎTEMî ra amebi qetil kerdene. 20ê êlula 1992î de Apê Mûsa Amed de tewrê Festîvala Kultur û Hûnerî bi û kitabê xo îmza kerdî. Seatanê şewe de Taxa Seyrantepe de netîceyê hêrişo çekin de Antero 72 serre de cuya xo vine kerd. Parlamenterê AKPyî Orhan Mîroglû ke a roje hetê Apê Mûsayî de bi û bado vejîya orte ke nameyê ci yê qodî ‘Tayfûn’ o endamê MÎTî yo, o zî birîndar xelisîya.

HEME QATILÎ SERBEST Î

JÎTEM ke serranê 90î de Kurdîstan de sey şebekeyê cînayetî xebitîyayêne, Apê Mûsa qetil kerd û no eşkera yo. Qatilî nimite nîyî her kes zano. La rixmê naye 8 serrî tehqîqatan ra çîyêk nêvejîya. Naye ser ra merdimanê Anterî serra 2000î de Dadgeha Heqanê Merdiman ya Ewropa (AİHM) rê muracat kerd. Dadgehe 19ê kanûna 2006î de Tirkîya sûcdar dîye û 28 hezar 500 Euro caza daye Tirkîya.

Tetîkkêşê JÎTEMî Abdulkadîr Ayganî bi serran dima îtîraf kerd ke înan Apê Mûsa kişto. Ayganî dîyar kerd ke ronayaxanê JÎTEMî ra sergord Ahmet Cem Ersever, bi nameyê qodî Yeşîl-Mahmût Yildirim, Mûstafa Denîz, Savaş Gevrekçî, Alî Ozansoy, îtîrafkar Cemîl Işik (Hogir) û Hamît Yildirim nê cînayetî ra berpirsîyar î.

MÎROGLÛ TAYFÛNÊ MÎTÎ VEJÎYA

Dawa bi serran o domîyena û sucdarî pêroyê sûcan red kenî. Derheqê Îtîrafkar Mahmût Yildirim, Fethî Çetîn, Aldulkadîr Aygan, Mûhsîn Gul, Cemîl Işikî de qerarê tewfîqkerdişî dîya. Velî Kuçuk û Mehmet Eymur dosya de sey şahîdî ameyî goşdarî kerdene. Kuçuk heme çî red kerd. Mehmet Eymur dîyar kerd ke Mîroglû ke wextê qetilkerdişê Apê Mûsayî de hetê ey de bi, bi nameyê Tayfûnî MÎTî rê xebitîyeno û înan seba ke cînayet bierzî ser PKKyî, o sax verdayo. Dadgehe Hamît Yildirimo ke tewfîqkerde bi, o zî serbest verada. Eke dawa wina dewam bikera do 4 serrî ra dima betal biba.

CUYA EY ZÎNDAN Û SURGUNAN DE VÊRTA

Apê Mûsa ke vatêne: "Ez şahidê ganî yê 55 serranê Tirkîya ya, heme çîyê ci zana, tena şahid nê verguman û mehkûm a zî.’’ Cuya ey surgun û zîndanan de vêrto ra. Apê Mûsa serrê 1920î de dewa Ziwingî ya Nisêbînê Mêrdînî de ame dinya, wayîrê hîrê qijan bi. Ûnîversîteya Huqûqî ya Stenbolî nîme de ca verda û dest bi nuştoxîye kerd. Rojnameyê Îlerî Yurtî de kurdî bi nameyê ‘Qimil /Kimil’ şîîrî nuştêne û no semed ra serra 1959î de ame tewfîq kerdene û îdamê ci ame waştene. Derbeya gulane ra dima serbest veradîya. Dima ra zî kovarê Deng, Dunya Barişi û Yon de nuşte. Serra 1963î de reyna kewte zîndan û pêro pîya 11 serrî û nîme zîndananê cîya-cîyayan de mend.

CAYO KE TEDE KIŞÎYA EWJA DE  YENO VÎR ARDENE

Apê Mûsa xeylê rojname û kovaran sey Azadîya Welat, Yenî Ulke, Ozgur Gundem, Rewşen û Telo de nuştî. Kîtabê ci bi nameyê Birîna Reş, Ferhenga Kurdî-Tirkî, Hatiralarim I, II, Vakayîname, Firat Marmaraya Akar û Çinara Min ameyî weşanîyene.

Ewro serrgêra şehadetê Apê Mûsayî yo û seba vîrardişê ey xeylê merasîmî yenê viraştene. Merasîma verêne seate 11.30 de kuçeyê Seyrantepe ke tede amebî qetil kerdene de do bêro viraştene. Cêm şane zî dewa ey Ziwîngê ke Akarsû Bûcagî ya Nisêbînî ra girêdaye ya, ewja de mezelê ci ser o do vîrardişêk bêro viraştene.