Almanya de rixmê qedexeyê Wezaretê Karê zereyî û tayê eyaletan de mehkemeyî qerar danê ke beyraqê YPGyî ‘sûc’ nêyê. Tewr peynî mehkemeya cayîye ya Gelsenkirchenî dewaya aktîvîsta Almane Monika Gärtner-Engele de qerarê beratî da.
Roja 20ê Adare 2018 de şaristanê Gelsenkirchenî yê eyaletê Renê Vakurî yê Vestfilya de seba protestokerdişê îşxalê dewleta Tirkî yê Efrînî yew numayîş amebi viraştene. Numayîş de dest dîyabi serê beyraqa YPGyî ya aktîvîsta Almane Monika Gärtner-Engele û derheqê ci de dewa amîbî akerdene.
Roniştişê vizêrênî yê dewa de mehkema qerar da ke kiriştişê beyraqa YPGyî sûc nêyo û derheqê YPGyî de Almanya de qedexeyêk çinyo.
‘QERARÊ MEHKEME SEBA HEQANÊ DEMOKRATÎKAN MUHÎM O’
Monika Gärtner-Engela ke dimayê qerarî qisey kerd vat no qerar seba pawitişê heqanê demokratîkan muhîm o û dimayê qerarê beratî ra seba ke înan mudaxeleyê numayîşêkê bidestûrî kerdo derheqê selahîyetdaranê asayîşî yê Gelsenkirchenî de pêhesnayîşê sûcî kerd.
Verî zî xeylî mehkemeyanê cayîyan qerar dabi ke kiriştişê beyraqanê YPGyî sûc nêyo. Menga Adare de Mehkemeya Pêardişî ya Aachenî derheqê yew Kurdistanijo ke hesabê xo yê facebookî de beyraqa YPGyî pare kerdebî de qerarê beratî dabi. Hetêna ra zî bêtehemulîya yewîyanê polîsan ê Eyaletê Bayernî yê hemverê YPGyî bale ancena. Polîsê Bayernî estbîyayîşê beyraqanê YPGyî keno behane û erzeno serê keyeyanê aktîvîstan, mehkemeyê na herême zî aktîvîstanê Kurd û Almanan rê seba ke paştî dayê YPG/YPJyî cezayan danê.
QEDEXEYO KE BI HAYÎNAMEYÊ 2Ê ADARE AME!
Wezaretê Karê zereyî yê Almanya bi hayînameyêk ke 2ê Adare de şirawitibi eyaletan waştibi ke beyraq û flamayê PYD, YPG, YPJ û xeylî partî û sazîyanê Kurdan bêrê qedexekerdene. Wezaretî hayîname sey newekerdişê qedexeyê sere PKKyî ke serra 1993 ra nata yeno bicaardene name kerdibi.
