Hemsereka Pêroyî ya HDPyî Pervîn Buldane derheqê redkerdişê AÎHMî yê muracatê Rayberê Şarê Kurdî Abdullah Ocalanî de reaksîyon nîşan daye û dîyar kerde ke no qerar eynî wextî de nizdîbîyayîşê Ewropa yê kurdan nîşan dano.
Hemsereka Pêroyî ya HDPyî û Endama Heyetê Îmrali Pervîn Buldane derheqê redkerdişê AÎHMî yê muracatê Rayberê Şarê Kurdî Abdullhah Ocalanî de reaksîyon nîşan daye.
Buldane va ‘ganî bêro fam kerdene ke no qerar eynî wext de nizdîbîyayîşê Ewropa yê kurdan zî nîşan dano’ û wina domnaye: “Birêz Ocalan tena 2015 ra nata nê, 20 serrî yo ke binê tecrîdêko giran de yo.”
Buldane dewamê qiseykerdişê xo de wina va: “No derheq de sere de Tirkîya û welatê Ewropa Mehkemeya Heqê Merdiman ya Ewropa (AÎHM) de bîyî wayîrê vindetişêko xirabin. Ganî Birêz Ocalan avûkat, keye û heyetanê xoseran reyde pêvînayîşan bikero. No heqê ci yê tebîî yo. Ma qerarê redkerdişî yê AÎHMî raşt nêvînenî.”
Buldane va ‘Ocalan kesêko normal û Zîndanê Îmrali zî sey zîndananê bînan nîyo’ û wina qedênaye: “Bi serran o no zîndan de tecrîd esto û no nîno qebul kerdene. Qeraro ke ewro hetê AÎHMî ra ameyo dayene zî nîşan dano ke tecrîd esto. Ganî merdim fam bikero ke no qerar eynî wext de nizdîbîyayîşê Ewropa yê kurdan nîşan dano. Ganî no qerar demêko raver bêro bedilnayene.”
