Koordînasyonê KJKyî bi wesîleya serrgêra Qirkerdişê Şingalî yê 3yê Tebaxa 2014î eşkerayîyêke daye. 

Eşkerayîye wina ya: ''Serra 10ine ya hêrişanê cerganê DAÎŞî yê vera Şingalî de ma şexsê Nûjiyan Erhan, Bêrîvan Şengalî, Arîn Şengalî, Dayê Gulê, Dayê Erzan, Cîlan, Mam Zekî, Dilşêr Herekol, Evîn Dêrik, Agit Civyan, Nûjin Siirt, Hêlîn Mardin, Berxwedan, Zerdeşt, Seîd Hesen,  Dijwar Feqir, Dilgeş Rojhilat, Genco Hewlêr, Pîr Çekoyî de pêro embazanê xo yê şehîdan bi rêz û minetî yad kenê. Şehîdanê ma rê ma soz danê ke Şingalê xoserî bi îradeyê şarê xo awan bikerê.

DAÎŞî hêrişê erjanê merdimatîye kerdbî û bi nameyê cuye çi est bi waşt qetil bikero. Nînan 2014 de hêrişê Şingalî kerd û waşt ke bi qetilkerdişê şarê ma yê êzidîyan cuye çin bikerê.

Tewr zaf cinîyan ê Şingalî nê hêrişan ra  zerar dî, bi hezaran cinî û domanî bazaran de ameyî rotene, ameyî qetilkerdene û dîyayî koçkerdene. Hema aqîbetê zafê cinîyan zî eşkera nîyo. Nê hêrişanê DAÎŞî îsbat kerd ke şaro ke xopawitişî û xorêxistinkerdişî nêkeno qirkerdişan de têrî maneno û do bimano. Şarê ma yê Şingalî nê qirkerdişî ra dersê xo girewtî. Şar û cinîyanê Şingalî bi felsefeya Rayber Apoyî xo ver da, rêxistinî û pawitişê xo ard ca. Cinîyan bi TAJÊ îradeyê xo mojna, bi YJŞ xopawitiş girewt binê garantî.

Şingalo xoser vera ferman û qirkerdişan cewabêko tewr manadar û pîl o û pûçkerdişê plananê gemarinan o. Dewleta tirke, hukmatê Iraqî û Barzanîyan pîya Peymana 9ê Teşrîna Verêne zî îmza kerde û êzidîyan rê anî koledarîye û qirkerdişî ferz kerdî. Oyo ke DAÎŞ nêeşka bikero bi na peymane do bêro kerdene. La Şingal hinî Şingalo verên nîyo. Ganî şarê ma û cinîyî vera komplo û hêrişan îdîaya cuya azade pîlêr  bikerê, ziwan, kultur, bawerî û erjanê xo bipawê û wayîrê destkewteyanê xo vejîyê, nînan bizêdînê.

Serra 10ine ya qirkerdişî de têkoşînê hesabpersayîşî wa bêro pîlkerdene. Dinya û rojhelatê Mîyanênî de ganî no qirkerdiş sey jenosîdî bêro qebulkerdene û DAÎŞ û hemkarê ci dewleta tirke û PDKyî bêrê muhakemekerdene. Ganî îradeyê şarê ma, Îdareyo Xoser ê Şingalî bişinasîyê.

Serra desine ya qirkerdişî de sere de cinî û ciwanî ma venga şar û rayaumûmîya demokratîke danê ke vera xeta xayîne ya PDKyî têkoşîn bikerê, destkewteyanê Şingalî bipawê û bihêzêr bikerê, şar hişmend bikerê. Qesasê nê qirkerdişî bi pawitiş û rêxistinîya cinîyan mumkîn o. Cinîyê ke her warê cuye de rêxistinîya xo bihêz kenê  do bibê garantîya şarê ma yê Şingal û Êzîdxanî.''