Qeyûmê Şaredarîya Wanî Kelaya Wanî de dest pê karê restorasyonî kerd la Camîya Suleyman Şahî ya ke mîyanê kela de ya, bi temamî rijnaye. Qeyûmî nameyê nê rijnayîşî zî kerd 'rekonstruksîyon.'

Hemvervatoxê Komîsyonê Ekolojî yê HDPyî Mesut Borî derheqê babete de qisey kerd û ard ziwan ke armanê qeyûmî restorasyon nîyo. Borî dîyar kerd ke cayê tarîxîyî bi hişmendîya vurnayîşê şaristanan yenê xerakerdene.

Borî vat: ''AKP-MHP bi hişmendîya rantî cayanê tarîxîyan de têgêreno.No çîyo aqilane nîyo ke bînayêka tarîxîye bi temamî bêra rijnayene. Krîterê restorasyonî dîyar ê; goreyê rewşa nikayêne ya berhemanê tarîxîyan ganî projeyî bêrê viraştene. Goreyê rewşa xo ya orjînale ganî malzeme û metodî bêrê weçînayene, bêrê dîyene û bêrê cigêrayene. Kelaya Wanî de nê krîterî nêameyî caardene û rewşa ci ya tarîxîye bi temamî yena çinkerdene. Rixmo ke ma nê çîyî çend reyî ardî ziwan înan şaşîtîye de israr kerd.''