28ê temmuza 1943yî de (Goreyê tay çimeyan 30ê temmuze de qezaya Qelqelî ya Wanî de qirkerdişanê tewr pîlan ê dewleta tirke yê vera kurdan ra yew ame kerdene. 33 kurdî hetê orgeneralê artêşa tirke Mustafa Muglaliyî ra Gelîya Sefoyî de bi gulevarnayîşî ameyî qetilkerdene. Qirkerdişî ra teyna dewijêk xelisîya û bi qalanê ci qirkerdiş ame eşkerakerdene.  Netîceya muhakemekerdişî de cezaya dardekerdişî dîyaye Muglaliyî. La verî ke Muglali îdam bibo zîndan de merd. Mergê ci ra dima nameyê ci zî dîya kuçe û baregehan.

Celal Uzuntaşo ke Qirkerdişê 33 Guleyan de babî, ap û pîrikê ci ameybî qetilkerdene ANFyî rê qisey kerd.

Uzuntaşê 81 serrî da zanayene ke o çax komêka ke îranî ra derbazê Tirkîya bena mêşnayan remnena. Komêka bîne zî tîya ra mêşneyan remnena bena Îranî. no sûc erzîyeno milê dewijanê ci. Uzuntaşî vat: 'Babî û kalê mi zî o çax axpînan de xebitîyenê. Tay kesan ê îxbar kerdê û îftîra kerda. Dewijî yenê destendkerdene, heta nînan rê yeno vatene ke ê do bikişîyê. La dewijî seba ke bêsûc ê bi ney bawer nêkenê. Dewijî a şewe yenê qetilkerdene. Mustafa Muglali o çax îdîanameyêkî nuseno û vano ke herême de pêkewtişî est ê. Teyna Îbrahîm Ozay xelisîyeno, o zî ciwanîya xo de mireno. Wextê serekwezîrîya Menderesî de serebût eşkera beno. Muglaliyî rê cezaya îdamî dîyena la o bi raporê 'nêweşê eqlî yo' îdamî ra xo xelisneno.''

Uzuntaşî bale ante ser ke Muglali dima sey qehremanêkî ameyo îlankerdene û vat: ''Çi sûcê ê dewijan est bîyo? Eke est bîyo çira 81 serrî yo nê sûcî eşkera nêbîyê. Muglali kiştoxê keyeyê mi bi. Mîyanê nê 33 kesan de di leşkerê ke seba izînî ameybî dewe est bîyê. Serleşkero ke leşkerê xo kiştê, beno qehreman? Muglali yewêdo zalim bi.

Qetilkerdişî ra dima zî leşkeran tim eşto dewe ser û cinîyan rê tecawuz kerdo. Zimistan bi, seba ke linganê ma de solî çin bîyê ma nêeşkayêne vejîyê teberî. Destûr nêdîyayêne ke ma heywankarîye bikerê.''

Uzuntaşî ard ziwan ke dewlete hema zî înan ra uzrê xo nêwaşto û vat: ''Eke na dewlete dewleta huqûqî ya ganî raştîyan eşkera bikera. Esteyê merdimanê ma hema zî a herême de yê û dekewtiş-vejîyayîşê herême qedexe yê. O çax fermandarêkê çerkesî vato ke înan heta serê sibayî nalayîşê merdimanê ma eşnawito. Ma hema zî wina binê îşkenceyî de yê, kurdî hema zî yenê qetilkerdene.''