Partîya Çep a Keske vizêr çarçewa xebatanê weçînayîşî de Anqara de mîtîngê xo kerd. Mîtîng rixmê provokasyonê polîsan zî bi coşî qedîya. Wekîlê HDPyî Kemal Bulbul û Murat Çepnî zî tewrê mîtîngî bîyî.

Mîtîngî ra dima wekîlan Bulbul û Çepnîyî bi rayîrê ANFyî venga şarî da.

Kemal Bulbul: ''Seba ke seserra diyîne ya komare de têdûştî, azadî û edalet est bê ma şorê sindoqan ser û bi rayanê xo paştî bidê Partîya Çep a Keske. Tek rayîr Partîya Çep a Keske ya.''

Murat Çepnî: ''14ê gulane ma do têkoşînê vera dizdan, kiştoxanê xoza û cinîyan û sîstemê rijîyayeyî geş bikerê. Pêro şarê ma do ney tercîh bikerê. Nika wext wextê geşkerdişê têkoşînî yo. Ma weçînayîşan de û weçînayîşan ra pey têkoşînê vera faşîzmî geş bikerê.''