Rayraşîyayîşê Azadîye yo Pîl seba azadîya Rayberê Şarê Kurdî Abdullah Ocalanî û çareserîya meseleya kurdan 1ê sibate de Wan û Qersî ra dîyabi destpêkerdene û ewro dewa Ocalanî Amara de do biqedo. 

Rayraşîyayîşê Azadîye yo Pîl resa qezaya Xelfetî ya Riha ke Rayberê Şarê Kurdî Abdullah Ocalan tede dadîya xo ra bîyo. Xelfetî de şarî bi sloganan girse pêşwazî kerd û girseyî reyde ver bi bînaya DEM Partî rayraşîyayîş kerd.

Tîya de Hemsereka Pêroyî ya DBPyî Çîgdeme Kiliçgun Uçar qisey kerd û seba paştdayîşî şarî rê sipas kerd. Çîgdeme ard ziwan ke şarê kurdî teyna haştîye wazeno coka azadîya Abdullah Ocalanî hewce ya. Çîgdeme vat: ''Ma venga dewlete danê ke seba ke meseleya kurdan bêra çareserkerdene wa pêro hêzanê xo seferber bikera. Eke Birêz Ocalan azad bibo şer do biqedo û meseleya kurdan çareser biba.

Kurdan vera DAÎŞo ke hetê hêzanê hegemonan ra ameyo afernayene têkoşînêko xurt kerd. Rojawan de kurdan bi paradîgmaya Ocalanî berêko newe akerd. Ma do ewro nê rayraşîyayîşî biqedînê la heta ke vengê Ocalanî bireso her kesî û meseleya kurdan çareser biba do têkoşîn bikerê.''

Girse ver bi dewa Abdullah Ocalanî Amara kewt rayîr.

Rayraşîyayîş qedîya

Girse dekewtişê Amara de ame astengkerdene coka agêra Xelfetî. Tîya de 75 raywanî bînaya DEM Partî de kom bîyî û înan bi sloganan eşkera kerd ke Rayraşîyayîşê Azadîye yo Pîl qedînayo.