Seba azadîya Rayberê Şarê Kurdî Abdullah Ocalanî Rayraşîyayîşê Gemlîkî 19ê teşrîna peyêne de do bêro kerdene. 

Rayraşîyayîşê Gemlîkî yo verên 2005 de amebi kerdene. Nê rayraşîyayîşî de Bursa de faşîstan hêrişê wesayîtanê kurdan kerdbi û waştbi ke kurdan zereyê wesayîtan de qetil bikerê. Rayraşîyayîşê Gemlîkî yê 2015î de ancî hêrişê kurdan ame kerdene û bi seyan kurdî ameyî destbendkerdene. 

Rayraşîyayîşê Gemlîkî yê 15ê sibata 2016î ra dima polîtîkaya tecrîdî amebî binvistene û 11ê êlula 2016î de Rayberê Şarê Kurdî de pêvînayîş amebi kerdene. Heta 2020î dewlete nêeşkaye pêvînayîşê bi Abdullah Ocalanî asteng bikera. Tewr peyên 25ê adara 2021î de Abdullah Ocalanî birayê xo de pê telefonî qisey kerdbi. a roje ra nata Ocalanî ra xeberêke nêna girewtene.

Vera tecrîdê Îmraliyî kurdî serkêşîya DBPyî de 19ê teşrîna peyêne de ancî Rayraşîyayîşê Gemlîkî bikerê. Sîyasetmedaranê DBP û HEDEPî bi rayîrê ANFyî venga pêro kesan da ke wa tewrê Rayraşîyayîşê Gemlîkî bibê.

Hemsereka Pêroyî ya DBPyî Çîgdeme Kiliçgun Uçar vat: ''Tecrîdê Îmraliyî berhemê eqlê şerî yê dewlete yo. Îqtîdarê AKP-MHPyî keno ke pê tecrîdî û krîzan welatî îdare bikero. La nê krîzî benê sebeb ke ameyoxê welatî û şaran destî ra şoro. Ganî ma verê nînan cayêkê xurtî ra  vejîyê. No zî pê şiknayîşê tecrîdê Îmraliyî beno. Tecrîd vera demokrasî, cuya azade û heqan astengêko tewr pîl o. Seba çareserîya nê meseleyan muxatab birêz Ocalan o. Coka Rayraşîyayîşê Gemlîkî heman wextî de rayraşîyayîşê demokrasî, azadî, têdûştî yo û awankerdişê ameyoxê hemparî yo.''

Hemsereka HEDEPî ya Îstanbulî Gonca Yangoz vat: ''Rayraşîyayîşê Gemlîkî seba şiknayîşê tecrîdî û azadkerdişê Ocalanî yeno kerdene û seba ney ma do bi xurtî têkoşîn bikerê. Eke tecrîdê Îmraliyî bişikîyo tecrîdê vera cuya ma zî do bişikîyo û dinyayêka azade aver şora.''

Hemserekê HEDEPî yê Îstanbulî Murat Kalmazî vat: ''Bi şiknayîşê tecrîdî verê demokrasî do abibo. Birêz Ocalan tek adresê çareserîya meseleya kurdan o. Bi nê rayraşîyayîşî ma do na raştîye û îradeyê xo bimojnê. Rayraşîyayîşê Gemlîkî nê hetî ra girîng o.''

Endamê Meclîsê Partîye yê DBPyî Cevdet Konakî vat: ''Tecrîdê Îmraliyî pêro komelî gêno binê ablûqa û hêrişê îrade û haştîya komelî keno. Heta ke tecrîd dewam bikero krîzê komelî zî do dewam bikerê. Rayraşîyayîşê Gemlîkî do têkoşînê demokrasî û azadîye berz bikero. Bêrê ma tewrê Rayraşîyayîşê Gemlîkî bibê, tecrîdî bişiknê û verê azadîye abikerê.''