Bajarê Lozanî yê Swîsre de kurdîstanijî serrgêra 100. ya Pêkerdişê Lozanî de vejîyayî waran. Kurdê ke verê bînaya Château d’Ouchyî ke tede pêvînayîşê Lozanî ameyî kerdene de ameyî têhet, ver bi Qesra Rumine ya ke tede pêkerdiş ame îmzakerdene, rayra şîyî. Badê rayraşîyayîşî mîtîng ame kerdene.

Tîya verê Endamê Komîteya Lozanî Yuksel Koçî qisey kerd. Koçî vera pêkerdişî hersê xo ard ziwan û vat: ''Kurdî 100 serrî yo binê îşxalê tirk, ereb û farsan de yê. Badê seserre ma kurdî çar leteyanê Kurdîstanî ra vanê, Ma tîya de yê, ma ma est ê. Seserrî yo rîyê nê pêkerdişî ra vera welatê ma polîtîkayê leyminî yenê rayraberdene. Helebçe ra heta rojawanê Kurdîstanî bajarê ma dayî bombayan ver. Kurdan bi hezaran qirkerdişî dîyî.  Hinî wextê yewbîyayîşî ameyo. Ma nê pêkerdişî qebul nêkenê. Ma do sey kurdanê çar parçeyan têkoşînê xo bidomnê.''

Hemsereka KNKyî Zeynebe Murat zî vîst vîrî ke ê semedê protestokerdişê Pêkerdişê Lozanî ûca de yê û vat: ''Kurdî kurdê verênî nîyê. Ma kurdî sîyaset, dîplomasî rayra benê, semedê nasnameyê kurdan xover danê, azadîya cinîyan aver benê. Slogana ma ya Jin, Jiyan Azadî bîye slogana heme cinîyan ê dinya. Ma pê têkoşînê gerîlayan û cinîyan ameyî nê rojan. Ma sîyasetê parçekerdeyî û polîtîkayanê bêadetlî qebul nêkenê.''

Parlementero swêdij û endamê Komîteya Ocalanî rê Azadîye yê Swêdî Dr. Beppe Savary-Borioliyî zî vat: ''Gerek Kurdîstan newe ra bibo Kurdîstan û PKK lîsteya terorî ra bêro vetene. PKKyî peynîya DAÎŞî ard. Ma herinda spasî de ey genê lîsteya terorî. Abdullah Ocalan zî hetê Ewropa ra ame teslîmkerdene.  No vera merdimîye sûc o. Azadîya Abdullah Ocalanî do Rojhelatê Mîyanênî zî bikero azad.''

Hemsereka PYDyî Asya Abdullah bi vatişê Jin Jiyan Azadî şar silam kerd û nê vatî: ''No pêkerdiş semedê parçekerdişê herra Kurdîstanî ame kerdene. Ma nê şermezar kenê û nê pêkerdişî qebul nêkenê. Ma Pêkerdişê Lozanî red kenê. Şarê kurdî seserre yo rîyê nê pêkerdişî ra xover dano û bedelê girdî dayî. Ma ewro tîya ra qîrenê vanê, ma est ê. Vera nê pêkerdişî cinî, doman, Rojawan, Îmrali, YPG û HPG xover danê. Bi seyan kesî şehîd bîyî. Ma do wayîrê xoverdayîşê şehîdanê xo bivejîyê. Xoverdayîşê Rayber Apoyî yê Îmraliyî zî vera nê Pêkerdişê Lozanî yo. Wa biciwîyo yewîya Kurdîstanî, wa biciwîyo yewîya cinîyan.''