Rejîmê AKP'yî cîhazê X-ray û holikî kerdî vernîya bananê şaredarîyan ê HDP'yî yê Cizîr, Hezex û Sîlopî. Mudirêk asayîşî zî, paşta xo daya polîtîkaya bêcezayîye û da zanayene ke ê vera qanûnan têgêrayîş kenê.
HDP'yî weçînayîşê cayîyan ê 31'ê Adare de şaredarîyê Cizîr, Sîlopî û Hezexî yê Şirnexî qeyûman ra girewtîbî. Polîsanê Tirkî şanê Sêşeme de X-ray û holikî vernîya bananê şaredarîyan de ca kerdî ca.
Cizîr de, seba ke dorê banê şaredarîye hetê polîsan ra ame girewtene, hemşaredar Mehmet Zirig û Berîvan Kutlu zî mîyan de xeylî kesî ameyî vernîya banê şaredarîye. Zirigî qeymeqamê qeza sey qeyûm name kerd û vat, "Ma do sere verê qeyûmî de nênê ro.”
Zirigî da zanayene, fermanêko nuştekî înan rê nêameyo û zêdebîyayîşê alozî reyde Mudirê Asayîşê Qeza ame vernîya banê şaredarîye û îdîa kerd ke no tedbîr seba asayîşê hemwelatijan o. Polîsan ard ziwan ke qerar hetê Walî û Qeymeqamîye ra ameyo dayene.
Wextê munaqeşeyî de hemşaredar Zirig, Mudirê Asayîşî yê Qeza ra persa, “Şima vera qanûnî têgêrayîş kenî?” û ey zî vat, “Heya, ma vera qanûnan têgêrayîş kenê.”
Dimayê alozîya ke bi saetan dewam kerde, polîsanê Tirkî cîhazê X-rayî vernîya banê şaredarîya Cizîrî de kerd ca. Zirigî da zanayene ke ê do vera naye bivejîyê.
Silopî de zî eynî rewşe qewemîyaye. Hemşaredaran reaksîyon da cakerdişê holika polîsan. Bişewe zî vernîya banê Hezexî de cîhazê X-rayî hetê polîsan ra ame cakerdene.
