Kombîyayîşê Heyetê Pêroyî yê 18. yê Kongreya Neteweyîye ya Kurdistanî rojanê vîyarteyan de Hollanda de ame viraştene. Çar perçeyê Kurdistanî ra û teberê welatî ra temsîlkarê KCK, YNK, Goran, Têgêrayîşê Îslamî, Partîya Komunîste ya Kurdistanî, Partîya Suryanî, organîzasyonanê cinîyan, Alewîyan, Êzidîyan, Zerdeştîyan, Yarsanîyan, Hewramanan û Feylîyan tewrê ci bîyî.   

Reşîdî ard ziwan ke amacê înan no yo ke heme partî, organîzasyon û sazîyanê kurdan biyarê têhet û yewîya neteweyîye virazê.

ŞARÊ KURDÎ DE NÊ PARTÎYAN DE PROBLEMÊ YEWÎYE ESTO

Reşîdî vat ke xîlaf û problemê mabênê partîyanê kurdan tewr zaf dişmenanê Kurdistanî şa kenê û wina dewam kerd: “Bitaybetî zî Tirkîye û Îran wazenê ke xîlafê ke mîyanê kurdan de yê bibê pîl, çunke ê nêwazenê yewîya neteweyî mîyanê kurdan de virazîyo. Kurdistan de xeylî bawerî û kulturan ra şarî estê. Nê şarî yewbînan nas kenê û hurmet ramojnenê.

Şarî mîyan de problem çinyo. Gama bajarêkê kurdan de problemêk virazêno Suleymanîye ra heta Amed, Amed ra heta Mahabad û Mahabad ra heta Qamişlo şar wayîr ro yewbînan vejêno. Şarî de problemê yewîye çinyo, mabênê partî û sazîyan de esto. ”

DEWLETA TIRKÎ ŞERR ÎMRALI RA DANA DESTPÊKERDENE

Reşîdî vat: “Sey KNK gureyê ma yo tewr pîl problemanê mabênê partîyanê kurdan raşte ra wedartiş o. Şarê kurdî wazeno ke partîyê kurdan bêrê têhet, aşitîya mîyanê xo virazê û dîyalogêkê neteweyîyî virazê. Çi heyf ke partîyê ma yê sîyasîyî nizdê nê nêbenê.”

Reşîdî peynîya qiseykerdişê xo de vat: “Ocalanî seva şexsê xo nê seva azadîya şarê xo mucadele kerd. Sere de dewleta tirkî hemeyê dinya zano ke azadîya şarê kurdî azadîya Ocalanî dir têkildar a. Na yewe ra şerr Îmrali ra dana destpêkerdene. Ma do sey KNK verê heme çîyî seva azadîya Ocalanî hîna zaf bixebetîyê.”