Rêxistina komelê sîvîlî ya ARCI ya ke vera kultutê kapatîlîstî hetê antîfaşîstan û çepgîran ra 26ê gulana 1957 ameye ronayene paştî daye kampanyaya ke semedê azadîya Rayberê Şarê Kurdî Abdullah Ocalanî yena rayraberdene.

ARCI ya ke xebatanê sîyasî zî rayra bena serranê 90an ra nata paştî dana têkoşînê azadîye yê kurdan. Pîya bi şorişê Rojawanî paştî daye xeylêk projeyanê komelkîyan. ARCI ya ke pêro Îtalya de mîlyonêkî ra zafêr endamê ci û 4 hezar 400 komelê ci estê kombîyayîşê neteweyî yê peyên de qerar girewt ke ê do paştî bidê kampanyaya ke semedê azadîya Rayberê Şarê Kurdî Abdullah Ocalanî yena rayraberdene. Reyna paştî dîyaye projeyê Konfederalîzmê Demokratîkî zî.

Kombîyayîş de nê ercnayîşî ameyî kerdene: ''Îdareyê Xoserî yê Rojawanî heme destkewteyê ke bi bedelanê pîlan fînayî dest, heme serkewtişê sosyal û demokratîkî nika binê tehlukeyê hêrişê îşxalî yê dewleta tirke de yê. Hem Rojawan û hem zî Mexmûr nê şertanê Covîd19î de binê ambargo de yê. Hêrişê leşkerî yê dewleta tirke  sûcê merdimîye yê. Rayapêroyîya dinya zî  vera nê sûcan bêveng a. Rîyê nê hêrişan ra se hezaran sîvîl û multecîyî binê rîskî de yê. Netîceya nê hêrişanê leşkerîyan de bajarê kurdan ameyî vêşnayene, bi hezaran sîvîlî ameyî qetilkerdene, sîyasetmedarê kurdî  ke HDPyî temlîs kenê û muxalîfî ameyî tepiştene. Reyna bi seyan rojnameger û endamê dinyaya akademîkî raştê îşkenceyî ameyî.''

Kombîyayîş de nê qerarî ameyî girewtene:

- Paştdayîşo ke semedê ronayîşê komfederalîzmê demokratîkî Rojawan rê yeno kerdene do bêro domnayene.

- Semedê paştdayîşê têkoşînê şarê kurdî do xebatê zanayîşdayîş bêrê kerdene.

- Seba parekerdiş û averberdişê projeyan û kampanyayanê  komele û komîteyanê herêman do koordînasyonêk bêro ronayene.

- Şaredarîyanê kurdan reyde do pêkerdişê dostîye û şaredarîyê wayûbirayî bêrê kerdene.

- Semedê paştdayîşê kampanyaya ke semedê azadîya Abdullah Ocalanî û tepişteyanê sîyasîyan yena kerdene do xebata aktîfe  bêro kerdene.

- Seba ke Tirkîya rê çeke mêro rotene do xebatî bêrê kerdene.