Seba azadîya Rayberê Şarê Kurdî Abdullah Ocalanî tepişteyê dewaya PKK û PAJKî 27ê teşrîna peyêne ya 2023yî ra nata grevê vêşanîye de yê. Seba paştdayîşê grevê vêşanîye Rêxistina Partîya Sosyalîste ya Bindestan (ESP) a Îstanbulî siba do dest pê grevê vêşanîye yê hîrê rojan bikera.

Îdarekara ESPyî Leyla Can derheqê babete de ANFyî rê qisey kerd. Leyla Can ard ziwan ke mîyanê têgêrayîşê çepî yê kedkarî de ferasetê şovenî nêvurîyayo û hema zî bi nê hewayî têgêrayîşê çepî yê Tirkîya ewnîyena têgêrayîşê kurdan ra.

Leyla Can îfade kerd ke têgêrayîşê çepe ganî nê ferasetê şovenîstî ra fek vera bido û paştî bido grevê vêşanîye. Leyla Can vat: ''Îtîrazê vera hêrişanê serê Filîstînî seba Rojawanî û kurdan nênê kerdene. Sey sosyalîstan erkê ma yo ke ma vera her neheqîye têbigêrê. Wekîla DEM Partî Adalete Kaya seba ke vera tecrîdê Îmraliyî qisey kerd bi mergî ameye tehdîtkerdene. Bi nê hawayî, bi tersî tecrîd yeno caardene.''

Leyla Can vist vîrî ke zîndanan de tedaya îqtîdarî zêdîyaya û tecrîdê Îmraliyî her cayî rê vila bîyo.Leyle Can vat: ''Ma sey ESPyî wazenê tesîrê şovenîzmî yê vera têgêrayîşê sosyalîstî yê Tirkîya bişiknê. Coka ma bira nê grevê vêşanîye yê hîrê rojan kerde. Ma her platformî de grevî kenê rojdem. Ma sey ESPyî kenê ke paştdayîşê teberî pîl bikerê, rojdem de verdê. Ma çalakîya xo ya grevê vêşanîye 23-24-25ê çeleyî de do bikerê.''