Îstanbul de rêxistinanê weşîye û pawitoxanê heqanê merdiman eşkerayîyêka hempare daye û  waşt ke vera virusê Korona semedê zîndanan tedbîrî bêrê girewtene.

Eşkerayîye de bale ameye antene şertanê zînana ser û ame vatene ke seba ke zîndanan de hîjyen çîn o rîskê nêweşîya Korona zaf o û ame waştene ke wa nê tedbîrî bêrê girewtene:

Wa dewlete û îdareyê zînanan  berpirsîyarîya xo bîyarê ca, vera virusî tedbîran bigerê û zîndanan û dormayê înan de û şertanê hîjenî bica bîyarê.

Wa zîndanan de warê ke wertax yenê şuxulnayene tim bêrê dezenfektekerdene.

Wa  werdo biwîtamîn bêrê dayene ke bedenê tepişteyan bihez bo ke bieşko vera virusî xo ver bido.

Wa nêweş, extîyar, astenkar, doman û diganî bi şertê kontrolê edlîyî bêrê veradayene û cezaya înan pey de bêro eştene. Mebo zî wa koguşanê sixletîyan ra bêrê vetene  û cayanê bihîjyen de bêrê cakerdene.

Wa dosyayê  nêweşanê ke înfazê înan ameyî pey de eştene cade bêrê cipersayene û şertê teberê zîndanî de tedawîkerdişî bêrê raameyene.

Wa personelê ke kewenê zereyê zîndanî goreyê şertanê vera virusî tê bigerê. Reyna sere de personelê weşîye kesê ke bi tepişteyan temas kenê wa  kincan û melzemeyê pawitişî bişuxulnê.

Wa hûmara persenelê weşîye yê zîndanan bêrê zêdêkerdene û wa testê tepişteyan û personelê zînanî yê ke şike nêweşîye esto lezabez bêrê kerdene.

Wa nêweşxaneyenê nidîyê zîndanan de tedbîrî bêrê girewtene ke hem nêweşxane hem zî zînanan de xizemetê weşîye bêro dayene.

Wa tepişteyî pê wasîtayanê rîngî nê pê wastîyanê pakan û goreyê weşîye bêrê berdene dezgehanê weşîye û nêweşxaneyan.

Wa derheqê zîndanan de serre de keyeyê tepişteyan û avûkatan rê rayapêroyî rê zanayîş bêro dayene.

Badê eşkerayîye sereka Komeleya Heqanê Merdiman (ÎHD) yê Şûbeyê Îstanbulî Gulseren Yolerî waşt ke tepişteyî serbest bêrê veradayene û semedê naye heyetêko xoser  bêro ronayene.