Meclîsê Rîsipîyan ê Rojawanî vera eşkerayîyanê Serekdewletê Sûrîye Beşer Esadî werişt payan ser ke estbîyayîşê kurdan seke çin o hesibneno.

Eşkerayîye de wina ame vatene: 

''Wextêk de ke pêro şarê Sûrîye pabeyê çareserîyêk o ke Sûrîyeya demokratîke awan bikerê û malê ferdî û komelkî yê pêroyan bipawê  Serekê Sûrîye şaranê ke Sûrîye anê meydan înkar keno.
Sûrîye de seba çareserîya mende ma seba dîyalogkerdişî veng danê.

Şarê Sûrîye sey kurdan, ereban, sûryanan û ê şaranê bînan pîya ciwîyenê. Kam beno wa bibo nêno qebulkerdene ke kesêk derheqê nê şara de bi îfadeyanê înkarî qisey bikero.

Eşkerayîyê Beşar Esadî Sûrîyeya Demokratîke rê xizmet nêkenê. Wexto ke dewleta Sûrîye erdê  xo nêpawitêne nê şarî bibê yew û vera îşxalan erdê Sûrîye pawit û Îdareyo Xoser awan kerd. Nê şarî hema zî vera îşxalî xo ver danê. Heman wextî de zî seba ke Sûrîyeyêka demokratîke, pirrengîye, humanîste awan bikerê hema zî xebitîyenê.''

Eşkerayîye de ame vatene ke estbîyayîşê Sûrîye bi demokratîkbîyayîş û pawitişê heqanê merdiman beno mumkîn û seba çareserîyêka mende ganî cade meseleya kurdî bêra çarekerdene.