Hemvervatoxa Partîya Çep a Keske Çîgdeme Kiliçgun Uçar banê HDPyî yê Esenyurtê Îstanbulî ke  bi hewayêkê korsankî ame sereştene, zîyaret kerd. Hemsereka HDPyî ya Îstanbulî Îlknure Birol, wekîlê Partîya Çep a Keske Ozgul Sakî û Celal Firat zî tewrê zîyaretî bîyî.

Îlknure Bîrol vera faşîzmî bale ante muhîmîya yewîye ser vat ê do vera zextan çok medê û bi têkoşînî sereberz  nê rejîmî bidê war.

Çîgdeme Kiliçgun Uçar zî nê vatî: "No hêrişê vera rêxistina qeza vera têkoşînê heme şaran o. Ma parlamento de parîya gird a hîrên ê. Bêxeberdayîşê îdarekaranê pertîye nimeyê şewe de operasyon ame kerdene. No hêrişê vera sîyasetê demokratî û têkoşînê şarê kurdî yo.  Goreyê huqûqî ma zanê ke gerek xebere bîdiyo hemserekan û cigêrayîş pîya bêro kerdene. Ma inkey nêzanê înan cigêrayîş de  çi girewt û zere de ci ca kerdo. Wa hukmat biewno peynîya îqtîdaranê verênan senî bîye  û têkoşînê kurdan ê 40 serran senî bi serekwtişî dewam keno. No îqtîdar wazeno HDP û Partîya Çep a Keske krîmînalîze bikero ke polîtîkayanê xo meşrû bikero. Ma heta ewro destûr nêda ma do medê. Sey vizêrî ma do ewro zî kuçeyan de  têkoşînê şaran ê birumetî xurtêr bikerê."