Aktîvîte û çalakîyanê Roja Ziwanê Dayîke ya Dinya de hêrişê dewleta tirke yê vera kurdkî ameyî şermezarkerdene. 

Dêrsim

Platformê Kede û Demokrasîyî yê Dêrsimî Meydanê Yeraltiyî de eşkerayîya çapemenîye daye. Wekîla DEM Partî ya Dêrsimî Aytene Kordu, namzedê Şaredarîya Dêrsimî yê DEM Partî Bîrsene Orhan û Cevdet Konak zî tede xeylêk kesî tewrê eşkerayîye bîyî. Hemserekê DEM Partî yê Dêrsimî Ozcan Gurtaşî eşkerayîye wende. Gurtaşî bale ante ser ke ganî domanê kurdkî û pêro domanê bînî bi ziwanê xo yê dayîke perwerde bivînê.

Cevdet Konakî zî îfade kerd ke ronîyayîşê Komara Tirkîya ra nata qedexeyê vera kurdkî dewam kenê û vat: ''Ganî ma her ca de bi ziwanê xo qisey bikerê û ziwanê xo bimusnê domananê xo.''

Çewlîg

Rêxistina DEM Partî ya Çewlîgî seba ke bale bianca Roja Ziwanê Dayîke verê bînaya xo de eşkerayîyêke daye. Eşkerayîye de pankartê kirdkî ''Zon ma welat ma wo'', ''Dem Demê Kirdkî yo'' ameyî akerdene. Eşkerayîye hetê Hemserekê DBPyî yê Çewlîgî Şevket Kalindamarî ra ameye wendene.

Anqara

Bînaya Egitim Senî de eşkerayîye ameye dayene. Eşkerayîye de qalê girîngîya perwerdeyê bi ziwanê dayîke ame kerdene.

Îstanbul

Şubeyê SESî de eşkerayîye dîyaye. Eşkerayîye de ame waştene ke wa sîstemê perwerdeyî bibo pirrziwanî û warê weşîye de  bi kurdkî xizmet bêro dayene.

Riha

Rêxistina DEM Partî qezaya Xelîlîye de eşkerayîya  bi kirdkî û kurmanckî daye. Eşkerayîye bi sloganê 'Bê ziwanî cuye nêbena' qedîyaye. Şubeyê ÎHDyî zî eşkerayîyêke daye.

Êlih

Serkêşîya ARÎ-DERî de rayraşîyayîşêk ame kerdene. Rayraşîyayîş de sloganî ameyî vatene û deyîrî ameyî vatene. Rayraşîyayîş de venga pêro kesan dîya de seba ke kurdkî biciwîya wa mesuldarîyanê xo bîyarê ca û têkoşînî pîl bikerê.

Sêrt

BOTAN-DERî bînaya xo de eşkerayîye daye. Wekîla DEM Partî Sebahate Erdogan zî tewra eşkerayîye bîye. 

Colemêrg

Rêxistina DEM Partî ya Colemêrgî pankarta 'Wa kurdkî biba ziwano fermî û perwerdeyî' akerde û eşkerayîyêke daye.

Mêrdîn

Serkêşîya DEM Partî de rayraşîyayîşêk ame kerdene. Hemsereka DEM PArtî ya Mêrdînî Necla Aribuca eşkerayîye de îfade kerd ke ganî kurdkî biba wayîra statuyêkê fermîyî. NEcla venga pêro kurdan da  ke seba ziwanê xo bixebitîyê.

Şirnex

Serkêşîya DEM Partî û Komeleya Kultur û Ziwanî ya Birca Belekî de eşkerayîyêke dîyaye. Wekîlê DEM Partî Zekî Îrmez û Newroze Uysal zî tewrê eşkerayîye bîyî. Cinîyî bi kincanê xo yê neteweyîyan eşkerayîye de amade bîyî.