Expression Interrupted raporê gulane-hezîrane pare kerd. Goreyê raporî 2 mengan de 109 rojnamegerî ameyî muhakemekerdene û 4 rojnamegeran rê cezaya zîndanî ya 9 serran û 8 mengan dîyaye.
Expression Interrupted raporê 'Rojdemê Azadîya Îfade û Çapemenîye' yê gulane-hezîrane pare kerd.
Rapor de tedaya vera çapemenîye ya Tirkîya cayêko girîng girewt. Rapor de ame vatene ke Tirkîya 2 mengan de hûmara rojnamegeran ê tepişteyan pê veradayîşê rojnamegerê MA Mehmet Aslan, Erkan Acar û Cuma Ulusî 68 ra bîye 65.
Rapor de dîya zanayene ke menganê gulane û hezîrane de 109 rojnamegerî ameyî muhakemekerdene, 4 rojnamegeran rê cezaya zîndanî ya 9 serran û 8 mengan dîyaye, derheqê 6 rojnamegeran de tehqîqat dîya destpêkerdene û 3 rojnamegerî ameyî destbendkerdene.
Rapor de ame parekerdene ke çalakî û nawnayîşan de şîdetê polîsanê Tirkîya yê vera rojnamegeran zêdîya. Rapor de kişîyayîşê Denîze Poyraz, betalkerdişê Peymana Îstanbulî, îtîrafê Sedat Pekerî yê serê Suleyman Soylu û Mehmet Agarî zî ca gênê.
