Vîrusê Korona yo ke Çîn de vejîya meydan nika zaf welatan de vila beno û roje bi roje tehlûkeyê ci beno zêdêr. Îran de zî vîrus her ke şino beno zêdêr.

Serekê merkezê weşîya şaristanê Seqîzî yê pawitişgehê Sinê yê Rojhelatê Kurdîstanî Enwer Behramîyî pare kerd ke nika 22 kesê gumandarê vîrusê Korona yê ke Nêweşxaneyê Xumeynî de binê kontolê doktoran de yê. Înan ra cinîyêka 55 serre vîrusê Korona ra merde û 2 kesanê bînan de vîrusê Korona ame tesbîtkerdene.

Goreyê rêjê merkezê weşîye nika pawitişgehê Sinê yê Rojhelatê Kurdîstanî de 8 kesî estê ke tede vîrusê Korona ame tesbîtkerdene. 

Cigêrayoxê beşê dermazsazîyan ê Wezaretê Weşîye yê Îranî Qasim Cîyanbabanîyî bire daye ke hînî nêweşxaneyî nêweşan nêgêrê û seba nêweşanê Korona amade bibê.

Hûmara qurbanan Çîn de resaye 2870 kesî

Komîsyonê Weşîya Neteweyîye yê Çînî zî derheqê Korona de raporê xo yê 1ê adare pare kerd.

Goreyê raporî mabênê 24 saetanê peyênan de vîrus gonîya 573 kesan de tesbît bi.

Vizêrî ra nata 35 kesê bînî vîrusî ra merdî û înan ra 34 kesî eyaletê Hunei ra yê. Bi nê hawayî hûmara merdeyanê Korona yê Çînî bîye 2870. Hûmara kesanê ke vîrusî ra kewtî zî 79 hezar û 824 a.

Tehlûkeyê vîrusê Korona pêro dinya de beno zêdêr

Çînî ra dimêr vîrus tewr zêde tesîrê Koroyê Başûrî kerd. Koreyê Başûrî de 3 hezar û 500 kesan nêweşîya Korona girewte û 17 kesî Korona ra merdî.

Îran: 9 hemwelatîyê bînî zî vîrusî ra merdî. Bi nê hawayî hûmara merdeyan resaye 43 kesî. 593 kesan de zî vîrusê korona ame tesbîtkerdene.

Îtalya: Bi hezar îtalyanijî bi vîrusê Korona kewtî. Heta nika 29 kesî vîrusî ra merdî. 11 şaristananê Îtalya de rewşa karantîna dewam kena.

Fransa: Heta nika 100 kesan de vîrus ame tesbîtkerdene û înan ra 2 kesî merdî.

Iraq: 13 kesan de vîrusê Korona ame tesbîtkerdene.

Amerîka û Awustralya de zî 2 kesî vîrusî ra merdî.