Awbendê Tişrinî û Pirdê Qereqozaxî 8ê kanûna 2024î ra nata raştê hêrişê dewleta tirke û çeteyanê ci yê SMOyî yenê. Hêrişê dewleta tirke yê vera waranê Îdareyê Xoserî zêdîyayî. Rojnamegeranê herême ra Dehat Tolhildanî derheqê qewimîyayîşan de cewab da persanê ANFyî.

Tolhildanî nê vatî:''Awbendê Tişrînî semedê çimeyê awe û elektrîkê herême muhîm o. Pirdê Qereqozax, rayîrê M4î nuqtaya ravêrtişê rayîrê bazirganîye ya. Coka nuqtaya stratejîk a. Eke wird nuqtayan de hakîmîyet bibo mabênê rojhelat û rojawanê Firatî de kontrol kewno dest. Dewleta tirke bi nê hêdefan xeta Eyn Îsa, Reqa, Tebqa, Şirînî de planê xurtkerdişê hêrişî kerd la xoverdayîşê wird nuqtayan vera cehdkerdişê îşxalê ci girewt. Badê xoverdayîşê Qereqozax û Tişrinî gala îşxalê vera Kobanê nîna kerdene. Xoverdayîşî nê hêrişî vindarnayî. Eke nê wird nuqtayî bikewtêne Dêrik, Hesekê û Qamişlo zî kewtêne tehluke. Xoverdayîşî planê dewleta tirke serûbin kerdî.

Destpêkerdişê şerî ra dewlet tirke bi heme hêzê xo yê teknînî mîyanê pêkewtişan de ya. Rixmê nê çeteyî nêeşkayî aver şirê. Tewr peynî teyarayê şerî kewtî dewre û bi bombardumananê girdan hêrişî xurtêr kerdî. Kobanê ra heta Dêrikî xeylê herêman de hêrişî yenê kerdene, bi teyarayê keşfî û çekanê giranan her firset de hêrişî yenê kerdene. Çeteyî Eyn Îsa, Girê Sipî û Serekanîyê de zî hêriş kenê la hêrişê înan yenê şiktine. Nê hêrişî newe nîyê; bitaybetî di serranê peyênan de bêmabên hêrişî yenê kerdene. Şer herêmanê Tişrîn û Qereqozaxî de giran bo zî her warî de şer est o. Dewleta tirke wazenê waranê Îdareyê Xoserî vila bikero. Rixmê hêrişanê ci yê giranan dewleta tirke netîce nêgena.

Pabesteyê QSDyî vera hêrişan bi îradeyê pîlî têkoşîn kenê. No xoverdayîş heme Sûrîye de tesîro gird keno. Xoverdayîş semedê ameyoxê Sûrîye rotaya muhîme bewlî keno. No têkoşîn hetê şaran ra hêvîyêke afirneno û ramojneno ke teslîmîye mumkun nîyo. Xoverdayîşê şervanê QSDyî reyna ramojna ke bi xoverdayîşê rêxistinkerdeyî  yê şaran çew eşkeno ser bikewo. Sûrîye de elewîyan ra heta durzîyan û xirîstîyanan her kes xoverdayîşê QSDyî ra moral genê. Yewna hêzo ke paştî şaranê Sûrîye çîn o. Modelê Rojawanî sîstemê pîyaciwîyayîşê şaran paweno coka pêro wazenê tede ca bigîrê. Komel nika aktîf mîyanê têkoşînî de ca geno.

Minbicî ra heta Şam, Hama û bajaranê xeta qeraxî xeylê cayan de hetê çeteyan ra qirkerdiş, dizdîye, talan û tecawuz yeno kerdene.  Na rewşe ramojnena ke seba şaran prosesêko tehlukeyin ciwîyeno. Hetê ameyoxê Sûrîye ra qisewetê giranî yenê afirnayene. Dewleta tirke paştî dana çeteyan û verê tehlukeyî akena. Bi nê metodan yeno waştene ke şarî bêrê tersnayene û teslîgirewtene. Heme dinya qirkerdişê çeteyan vînena la vengê xo nêvejena. Ganî verê nê çeteyan bêro girewtene. Mebo çeteyî dahîna cesaret genê û hêriş û qirkerdişan zafêr kenê. Ganî hêzê mîyanneteweyîyî paştî bidê şaranê Sûrîye.''