TJK-E bi wesîleya serrgêra Qirkerdişanê Parisî yê 9ê Çeleyê 2013î û 23yê Kanûna 2022yî eşkerayîye daye û semedê tewrbîyayîşê çalakîyan veng da.

Eşkerayîye de nê ameyî vatene: ''Ma rayîrê Sarayan, Rojbînan, Ronahîyan û Evînan de  kewtî serrêka têkoşînî ya nêwî. Ma reyna sere de hemra Sakîne Cansiz-Sara ya ke têna serkêşa rayraşîyayîşê azadîye yê girdî yê seserran a, şehîdanê Parisî bi hurmet, mînet û hesrete yad kenê.

Ma 12 serrî yo gêrenê edaletî û tim hesab persenê la 12 serrî yo sloganê ma û waştişê ma yê edaletî bêcewab mendî û plankerê qirkerdişî nêameyî cezakerdene. Rixmo ke mesuldarê nê qirkerdişî MÎT o ceza nêdîyaye û berê Qirkerdişê Parisî yê Diyînî ame akerdene. Dewleta tirke zî hîna bi barbarî verê xo da Başûr, Rojawan û şarê kurdî kerd hedef. Sey Qirkerdişanê Parisî dewleta tirke tim bi hawayêkê sîstematîkî cinîyan kena hedef.

Ma do 9ê çeleyî ancî bi qerardarîya hesabpersayîşî pêşwazî bikerê. Ma do çalakîyanê yadkerdişî yê emserînan de bi şîarê 'Kiştox dîyar o! Fransa çira bêveng a?' rayraşîyayîş bikerê. Ma do ancî kiştoxan ra hesab bipersê û venga Fransa bidê ke hemkarîya sûcî nêba.

Ma do pêroyê Ewropa de çalakîyanê girseyînan bikerê. Paris de saete 11.00 de, Merkezê Kulturê Kurdan ê Ahmet Kayayî ra ver bi Buroyê Enformasyonî yê Kurdan ê Parisî rayraşîyayîşêk bikerê. Heman roje do şaristananê Ewropa yê bînan de çalakîyan bikerê.

Ma do 11ê çeleyê 2025î de, roja şemeyî, saete 10.00 de Gare du Nordî ra dest pê rayraşîyayîşî bikerê. Ma venga meclîsanê xo, cinîyan ê kurdan, şarê ma, rêxistinanê cinîyan, hêzanê demokratîk û sosyalîstan û dostanê xo danê ke tewrê çalakîyanê 9 û 11ê çeleyî bibê.''