Hesekê de serkêşîya Kongreya Starî de bi slogana ''Ma do bi yewîya cinîyan Sûrîyeyêka demokratîke înşa bikerê'' bi tewrbîyayîşê 500 delegeyan Komxebeta Mişewreyî ya Cinîyan ameye kerdene.  Komxebata bi eşkerayîyêka hempare qedîyaye.

Eşkerayîye de ame vatene ke wextê şerê Sûrîye yê 12 serrî de tewr zaf cinîyan bedelî dayê, cinîyan bi fedayîtî xeta Arîn Mîrkan, Avesta Xabûr, Rêvan Kobanê, Jiyan Tolhildan, Sosin Bîrhat, Seada, Hind, Qemer, Şamîram xabûr, Wîdad Yunan, Elerya Yaqûb ûsn. de xo ver dayo û DAÎŞ bin visto.

Eşkerayîye de bale ameye antene ser ke Rojawan de cinîyan sîstemêko newe yo demokratîk aferna û bi paradîgmaya azadîgîrîya cinîyan şorişê cinîyan ard ca. Eşkerayîye wina dewam kena: ''Ma do nê destkewteyanê xo bipawê, azadîya cinîyan aver berê. Rijîyayîşê rejîmê Sûrîye ra dima ancî tehluke est o ke îdareyêko unîter bêro awankerdene û cinîyî çin bihesibîyê. Coka ganî cinîyî bi hawayêkê aktîfî tewrê prosesî bibê. Ma sey cinîyanê Rojawanî felsefeya Jin, Jiyan, Azadî vurnaye û kerda sîstemê xo. Ma venga pêro cinîyanê Sûrîye danê ke sey cinîyan înîsîyatîf bigêrê û seba Sûrîyeyêka azade û demokratîke têkoşînê hemparî geş bikerê.''

Komxebate de nê birî ameyî girewtene

''Deklarasyonê Meclîsê Cinîyan ê Sûrîye ganî bi aktîfî bêro caardene.

Xebatê bitesîrî seba caardişê azadî û heqanê cinîyan ê ke Hempeymana Komelkî ya Îdareyê Xoserî de ameyê vatene wa Qanûnê Neweyî yê Sûrîye de bêrê esaskerdene.

Pêro herêmê îşxalkerdeyî yê Rojawanî bêrê xelisnayene û koçberî wa abigêrê.

Wa hempeymana komelkî ya cinîyan bêra îlankerdene.

Wa kongreya cinîyan bêra  kerdene.

Wa hukmatê demkîyî de îradeyê cinîyan bi beşdarîya cinîyan bêro temsîlkerdene.

Wa cinîyî komîteya nuştişê Qanûnê Bingeyînî de ca bigêrê.

Wa babeta heqanê cinîyan de sînordarkerdişî rê destûr nêro dayene.

Mudaxeleyê vera xebitîyayîş, perwerde, heqan, kincan û kerdişanê cinîyan wa nêrê qebulkerdene.

Îdareyo Xoser ê Cinîyan ganî sey erkdarê caardişê azadîya cinîyan bêro dîyene.''